Guía de nomes galegos

Do nome latino Marcellus, diminutivo de Marcus  e xentilicio da familia Claudia.

San Marcelo de León ou da Gallaecia foi un centurión romano do século III, casado con santa Nonia (ou Nona). Tiveron unha ducia de fillos, todos mártires e santos, como os seus pais, venerados en distintos lugares da Península Ibérica, divididos en grupos de dous e tres irmáns: Servando e Xermán; Facundo e Primitivo; Clodio, Lupercio e Vitorico etc.

Houbo dous papas con este nome: san Marcelo I (308-309), obrigado polo emperador Maxencio a servilo como palafreneiro; e Marcelo II (século XVI), que chegaría a presidir o Concilio de Trento (1545).

Santa Marcela de Roma (séculos IV-V) foi a primeira matrona romana que impulsou os principios do monacato.

O sacerdote, profesor, arqueólogo e numismático Marcelo Macías García, natural de Astorga (1843) e asentado en Ourense desde 1884 ata a súa morte (1941). Na súa honra creouse en 1943 o grupo Marcelo Macías de colaboradores do Museo Provincial de Ourense.

As mestras galegas Marcela Gracia e Elisa Sánchez constituíron en 1901 o primeiro matrimonio entre persoas do mesmo sexo do que se ten noticia. En 2018 a cidade da Coruña dedicoulles unha rúa, e en 2019 a cineasta Isabel Coixet presentou o filme Elisa e Marcela, rodada en Galicia, que narra a súa complicada historia.