Guía de nomes galegos

Do francés medieval Galaads ou Galahads, nome do personaxe artúrico, talvez inventado polo autor da Demanda do Santo Graal. Na súa base pode estar un galea 'elmo'.

Galaaz é un personaxe lendario, o principal da Demanda do santo Graal, manuscrito medieval escrito en galego pertencente ao chamado Ciclo Bretón ou Materia de Bretaña. Era fillo ilexítimo de Lanzarote. De adulto foi armado cabaleiro polo seu pai e marchou despois á corte do rei Artur en Camelot, onde estaban reunidos os cabaleiros da Táboa Redonda. Ocupa nesta mesa a Seeda Perigosa (a ‘Cadeira Perigosa’), reservada para o único cabaleiro do mundo que tería éxito na procura do santo Graal, o cáliz da última cea de Cristo. Os cabaleiros marchan todos na procura do vaso sagrado e a uns e a outros acontécenlles moitas aventuras (a Besta Ladrador, O Cervo Branco…), pero tan só tres deles —Galaaz, Boors e Perceval— terán éxito na busca. Finalmente será Galaaz o único que dará co cáliz, pois só el era o cabaleiro puro e casto, libre de pecado: o cabaleiro perfecto. Será levado aos ceos coma o profeta Elías bíblico.