Guía de nomes galegos

Do grego Kŷros a través do latino Cyrus, adaptacións do nome persa antigo Kuras ou Kuris, de significado ignoto.

Ciro II o Grande (559-530 a. C.), fundador do Imperio persa, foi o máis famoso dos emperadores da dinastía aqueménida. No ano 550 a. C. conquista o territorio dos medos e afianza a súa hexemonía sobre todo o Irán. Pasou á historia por ser clemente cos vencidos, fronte á crueldade dos asirios e doutros pobos imperialistas da antigüidade. Permitiu que todos os estranxeiros reféns de nacións vencidas polos medos regresasen aos seus respectivos países. Na Biblia cóntase que a entrada de Ciro en Babilonia foi unha liberación para os xudeus deportados; considerárono un mesías, pois grazas a el puideron regresar libres a Xerusalén.

Houbo tamén un san Ciro de Tarso, do século III, e tamén outros santos así chamados en Francia, onde existen localidades denominadas Saint-Cyr.