Guía de nomes galegos

Do latín Cyrillus, e este do grego Kýrillos, nome persoal testemuñado só en época cristiá, que significa 'divino; do Señor'. Deriva da voz grega kýrios 'señor, patrón', que na época cristiá pasou a designar a Deus (coma Ciríaco).

San Cirilo de Alexandría (c. 376-444), bispo e patriarca desta cidade, está considerado desde o século XIX un dos padres da Igrexa oriental. Foi o principal instigador dun grupo de fanáticos cristiáns que entraron na Biblioteca de Alexandría, o templo do saber da antigüidade, e a destruíron por completo, queimando os seus libros e papiros. Ata daquela, Alexandría era unha cidade tolerante na cal convivían cristiáns, xudeus, pagáns e mesmo xente descrida, como parece que era o caso da filósofa e sabia Hipatia.

San Cirilo o Filósofo ou Constantino Cirilo (827-869), apóstolo dos eslavos, nacera en Tesalónica (Grecia), como o seu irmán Metodio. Os dous fixeron a súa prédica en idioma eslavo, que era o que falaban os pobos desa etnia, e crearon o alfabeto desas linguas ágrafas, que na honra deste santo se denomina alfabeto cirílico.