Guía de nomes galegos

Forma macedonia do grego Phereníkē, de phérein 'levar' e níkē 'vitoria': 'a que leva á vitoria'. É un nome macedonio que se puxo de moda na época de Alexandre Magno e se difundiu especialmente en Exipto.

Nome que levaron algunhas princesas ptolomaicas. A máis coñecida foi Berenice II, filla do rei Magas de Cirene e esposa do faraón exipcio Ptolomeo III Everxetes (século III a. C.), que ofreceu a súa cabeleira á deusa Afrodita se o seu home volvía san e salvo dunha guerra. A cabeleira de Berenice foi a elexía que o poeta grego cirenaico Calímaco (c. 310 - c. 240 a. C.) lle dedicou a esta raíña. Así mesmo, o astrónomo grego Conon de Samos denominou Cabeleira de Berenice a constelación de sete estrelas que descubrira, argumentando que os deuses puxeran no ceo a cabeleira da raíña.

Na Biblia cítanse dúas princesas xudías con este nome. Unha delas era filla de Herodes Agripa I (século I); foi levada a Roma polo xeneral romano Tito —conquistador de Xerusalén no ano 70— para casar con ela. Esta historia inspirou os dramaturgos franceses Jean Racine e Pierre Corneille, que estrearon no mesmo ano (1670) unha traxedia (Berenice, no caso do primeiro) e unha comedia (Tito e Berenice, no caso do segundo).

É tamén coñecido un conto de terror de Edgar Allan Poe titulado Berenice (1835).

Berenice Abbott (1898-1991), fotógrafa estadounidense coñecida polos seus retratos de figuras culturais do século XX.