Guía de nomes galegos

Do grego Akhilleús, a través do latín Achilles. Nome antiquísimo en Grecia, reliquia probablemente dalgunha lingua pregrega e, polo tanto, de etimoloxía case imposible, a pesar das moitas hipóteses aventuradas.

Aquiles é o heroe máis famoso da mitoloxía grega, o principal da Ilíada de Homero. Era fillo do rei Peleu e da ninfa Tetis, quen, para eliminarlle os elementos mortais do pai, o mergullou na lagoa Estixia termando del polo calcañar, que sería o seu único punto vulnerable. Aquiles incorporouse á loita dos gregos contra os troianos, e destacou pola súa temible cólera. Venceu en combate singular o xefe troiano Heitor, pero morreu no campo de batalla ao ser alcanzado no calcañar por unha frecha lanzada polo troiano Paris.

Na versión galega medieval da Crónica troiana (século XIV), Aquiles non morre deste xeito, senón nunha celada que lle preparou Paris cando el pensaba encontrarse coa súa amada Políxena.