Guía de nomes galegos

Nome de introdución recente, probablemente a través do francés, aínda que de orixe xermánica, formado por *eber ‘xabarín’ e hard ‘forte’, transformado talvez pola atracción de Abel.

Pedro Abelardo, filósofo e teólogo bretón do século XII, catedrático da Universidade de París, foi o principal difusor deste nome. A súa sona aumentou por ser o tráxico amante de Heloísa, sobriña do cóengo Fulberto, que lle confiara a súa educación. Foron uns amores secretos e prohibidos, que se descubriron cando Heloísa quedou embarazada. Por traizoar a súa confianza, Fulberto mandou castrar a Abelardo, que, humillado, entrou de monxe na abadía de Saint-Denis, e Heloísa, de monxa en Argenteuil.

Perpetuaron a súa memoria a partir do século XVIII o poeta inglés A. Pope e o pensador francés Jean-Jacques Rousseau.

O latinista Abelardo Moralejo Laso (1898-1983), zamorano de nacemento, realizou importantes investigacións toponímicas sobre Galicia e León.