Guía de nomes galegos

De orixe incerta, probablemente do asirio habel, habal 'fillo'; outros atribúenlle o significado de 'efémero'.

No libro da Xénese da Biblia, Abel, o segundo fillo de Adán e Eva, é considerado bo e temeroso de Deus, só ocupado en coidar os seus rabaños e ofrecer frecuentes sacrificios á divindade. É a antítese de Caín, que era labrego e descoidado no culto divino por confiar máis nos bens terreais. A envexa levou a Caín a matar a Abel, de xeito que o pastor foi o primeiro mártir, e o labrego o primeiro asasino.

Algúns autores ven neste episodio o impacto —coa conseguinte crise relixiosa— que representou en tempos prehistóricos a revolución dos pobos do Neolítico, inventores da agricultura e, polo tanto, produtores de alimentos fronte ao inmobilismo e ao providencialismo dos pobos do Paleolítico, que se limitaban a recoller os alimentos proporcionados pola natureza.

O xeógrafo francés Abel Bouhier (1921-1997), autor dunha importante investigación xeográfica sobre Galicia: La Galice, essai géographique d'analyse et d'interpretation d'un vieux complexe agraire (1979).