Guía de nomes galegos

É este un dos nomes recuperados no Renacemento en memoria do político, militar e escritor romano Caio Xulio César (100-44 a. C.). Plinio o Vello, historiador romano, explicaba este cognome dicindo que César fora cortado do ventre da nai (a caeso matris utero), de onde procede a denominación actual da operación cesárea. Pero non parece probable que fose esta a orixe, xa que seu pai xa levaba este nome, Gaius Iulius Caesar. Outros din que caesaries 'cabeleira de home' sería un alcume físico da familia. Finalmente, tamén hai quen opina que é un nome de orixe etrusca, como gran parte da onomástica romana. Tras a extinción da casa Xulia, o emperador Claudio converteuno nun título distintivo da casa reinante, e de aí pasou á lingua común como sinónimo de 'emperador'. De feito é a orixe do Kaiser alemán e do Tsar ruso.

Xulio César figura como personaxe literario en innumerables obras de grandes escritores: Dante, Shakespeare, Voltaire, Goethe, Balzac, Bernard Shaw etc.

Outro personaxe de sona foi César Borgia, que gobernou os Estados Pontificios durante o papado do seu pai Alexandre VI (1492-1503).

Os galegos César Vaamonde Lores (1867-1942), historiador e membro da Real Academia Galega, e  César Alvajar Diéguez (1892-1965), escritor, xornalista e político.