Guía de nomes galegos

De orixe toponímica, é un diminutivo de anta 'dolmen' ou 'pedrafita', á súa vez do latín antae, -arum 'pilastra, esteo'. Anthḗla tamén é, en Grecia, un lugar próximo ás Termópilas onde se reunían os anfictións.

Nome tomado da toponimia galega: a lagoa de Antela —hoxe desecada—, na comarca da Limia. Foi a lagoa de auga doce máis grande de España e estaba rodeada por vinte vilas e aldeas. A tradición dicía que nela quedou asolagada a cidade de Antioquia, que as torres das súas igrexas se deixaban ver nas secas e que ás veces mesmo se oían tanxer as campás.