Ilustración e defensa do idioma

Na presidencia de Xosé Ramón Barreiro proseguiuse a liña de diálogo e asunción de responsabilidades marcada polo seu predecesor. O resultado deste compromiso concretouse en feitos como a reforma ortográfica acordada en 2003, coñecida como “normativa da concordia”. No prólogo destas normas reformadas recóllese:

As escollas normativas deben ser harmónicas coas das outras linguas, especialmente coas romances en xeral e coa portuguesa en particular, evitando que o galego adopte solucións insolidarias e unilaterais naqueles aspectos comúns a todas elas. Para o arrequecemento do léxico culto, nomeadamente no referido aos ámbitos científico e técnico, o portugués será considerado recurso fundamental, sempre que esta adopción non for contraria ás características estruturais do galego.

(do prólogo ás NOMIG 2003)

Entre 2001 e 2012 produciuse unha renovación importante do Plenario, con ingreso de dez novos numerarios: Francisco Díaz-Fierros (2002), Rosario Álvarez Blázquez (2003), Víctor F. Freixanes e Xosé L. Axeitos (2004), Ramón Villares e Euloxio Ruibal (2006), Manuel Rivas e Margarita Ledo (2009), Henrique Monteagudo e Xosé L. Regueira (2012).

A partir de 2009 a Xunta de Galicia comeza a aplicar unha política lingüística regresiva que é recibida cunha ampla repulsa social e institucional. Así, a Real Academia interpón un recurso ante o Tribunal Superior de Xustiza de Galicia contra o Decreto chamado do plurilingüismo, recurso que é parcialmente estimado. No obstante, nos anos sucesivos a Academia elevou este recurso ao Tribunal Supremo español (2015), ao Tribunal Constitucional e incluso ao Tribunal Europeo de Dereitos Humanos (2016).

Liña do tempo

2001

• Presentación da proposta inicial de reforma das Normas Ortográficas e Morfolóxicas do Idioma Galego (NOMIG)

2003

• Aprobación da reforma das NOMIG (“normativa de concordia”).
• Ingreso de Manuel María Fernández Teixeiro.
• Remata a revisión do Nomenclátor de Galicia, con máis de corenta mil topónimos.

2004

• Publicación en papel do Dicionario castelán-galego e da versión definitiva do Vocabulario Ortográfico da Lingua Galega.

2005

• Ponse en liña o primeiro sitio web da RAG.

2006

• Exposición do centenario da RAG.
• Ingreso de Darío Xohán Cabana.

2010

• Declaración da RAG e recurso xudicial contra o Decreto do Plurilingüismo.
• Ingreso de Bernardino Graña.
• Publicación en papel do Dicionario da pronuncia da lingua galega.

2012

• Ponse en liña o Dicionario da Real Academia galega, con máis de 50.000 voces.