Fuxan os Ventos converte en canción un poema da protagonista das Letras

Fuxan os Ventos acaba de facer pública a súa homenaxe á autora protagonista do Día das Letras Galegas 2018. O grupo difundiu a través de distintas canles o vídeo no que interpreta "Lúa de prata", adaptación musical de "Cantiga", un dos poemas que se fixeron públicos en Elexías de luz (Xerais, 2006), a obra póstuma que recolle a poesía para adultos da escritora.

Con esta canción, a emblemática formación folk quere lembrar a autora "que tan fonda pegada deixou nas nosas letras, especialmente na literatura infantil e xuvenil", salienta o selo de Fuxan os Ventos. Porén, o poema elixido forma parte do libro que lle presentou ao público postumamente a María Victoria Moreno máis descoñecida, a autora de poesía para adultos, nunha edición a cargo do seu amigo Xavier Senín. Seguindo o ronsel doutros anos, o grupo volve render homenaxe ás nosas letras "cunha harmonía de sons, na que as voces, vento, corda e percursión van da man sublimando as verbas de María Victoria Moreno", engade a distribuidora.

Na interpretación do tema colaboran Roi Adrio nas percusións, Simón García no contrabaixo, Adrián Valdés no fagot e Miguel Díaz no clarinete.

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar