A coordinadora do proxecto da Real Academia Galega para o público infantil, Primavera das Letras, xa optou en 2011 e 2012 a se facer con este recoñecemento, o segundo premio máis importante a nivel mundial no campo da literatura infantil e xuvenil. O primeiro é o Hans Christian Andersen, considerado o Premio Nobel neste eido, que opta tamén a gañar o ano que vén canda Elena Odriozola na modalidade de ilustración.

O galardón que leva o nome da creadora de Pippi Mediaslongas ten por obxecto potenciar o interese na literatura infantil e xuvenil e fomentar os dereitos da infancia. Un total de 245 candidatos e candidatas de 68 países están nomeados na última edición. O nome da persoa gañadora darase a coñecer o vindeiro mes de abril.