A Fundación Penzol lembra a académica Olga Gallego no seu centenario

A Fundación Penzol celebrou o venres 6 de outubro unha xornada de homenaxe á académica Olga Gallego anticipándose á celebración, o vindeiro mes de decembro, do centenario do seu nacemento. A arquiveira e historiadora asumiu no seu momento a catalogación dos fondos desta institución, que lle dedica tamén o último número do seu boletín Novas da Penzol.

Un momento da mesa redonda sobre Olga Gallego. Foto: Vicente Alonso / Atlántico Diario

O presidente da Real Academia Galega, Víctor F. Freixanez, participou na apertura do acto de homenaxe canda o presidente da Fundación Penzol, Manuel Puga; e o concelleiro de Cultura de Vigo, Gorka Gómez.

Posteriormente celebrouse unha mesa redonda sobre a obra e o legado da arquiveira. O encontro, moderado por Malós Cabrera, vicepresidenta segunda da Penzol, contou coas achegas de Pedro López Gómez, presidente da Fundación Olga Gallego; Carmen Pérez Pais, padroeira da Penzol; e Mar García Miraz, sexa do servizo do Arquivo de Galicia.