O Ano Antonio Fraguas bota a andar oficialmente na súa casa natal

"Con este acto iniciamos simbolicamente o Ano Antonio Fraguas, a quen a Real Academia Galega homenaxeará co Día das Letras Galegas. Será un ano de celebración arredor da figura de don Antonio e, ao mesmo tempo, de reivindicación da lingua e da cultura popular, expresión da lealdade histórica do pobo galego a prol da súa identidade. Antonio Fraguas dedicou a súa vida a estudar as raíces que nos explican a todos nós". Con estas palabras o presidente da RAG. Víctor F. Freixanes, abriu onte en Cotobade, no lugar da Insuela, parroquia de Loureiro, na casa natal do autor, as Letras Galegas 2019.

O presidente da Real Academia Galega, Víctor F. Freixanes, intervén no acto celebrado na casa natal de Antonio Fraguas. Fonte: Concello de Cerdedo-Cotobade


O alcalde de Cerdedo-Cotobade, Jorge Cubela, fixo de anfitrión e deu a palabra a todos os invitados, institucións que se suman á celebración do Día das Letras Galegas: o Museo do Pobo Galego e a Fundación Antonio Fraguas, representados polo seu presidente, o historiador Xusto Beramendi; a Deputacion de Pontevedra, representada polo deputado de cultura, Xosé Leal, a Xunta de Galicia, representada polo director xeral de Políticas Culturais, Anxo Lorenzo, e a familia de Antonio Fraguas, en representación da cal falou o seu sobriño Xosé Martínez.

Logo das intervencións descubriuse na fachada da casa natal unha placa conmemorativa, deseñada por un canteiro do lugar e, a continuación, interpretouse o Himno Galego. Diante dun numeroso grupo de asistentes, constituido por representantes de institucións políticas e culturais, así como por vecinos e veciñas de Cerdedo-Cotobade, os presentes fixeron votos por unha celebración activa e participativa do Día das Letras Galegas, na liña de mobilización civil que nos últimos anos vén animando a onomástica do 17 de maio.

Proximamente, presentarase nos colexios de Cerdedo-Cotobade a iniciativa Primavera das Letras, dirixida a escolares de educación infantil e primaria, promovida tamén pola Real Academia Galega.


Veciños e veciñas participaron na apertura do Ano Antonio Fraguas. Fonte: Concello de Cerdedo-Cotobade

 


O alcalde Jorge Cubela amosa a placa conmemorativa instalada na fachada da casa natal de Antonio Fraguas. Fonte: Concello de Cerdedo-Cotobade

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar