Foto de familia das persoas participantes no acto ás portas da Facultade de Ciencias da Comunicación.
O presidente da RAG conversa coas protagonistas da serie que asistiron á estrea.
Ana Isabel Rodríguez, decana de Ciencias da Comunicación da USC, nun momento da súa intervención, acompañada do presidente da RAG, Víctor F. Freixanes, e o vicerreitor de Profesorado, Ernesto González Seoane.
Fonte: RAG
Esther Estévez, Antía Castro, Laksmy Irigoyen, Andrea Pousa e Lucía Freitas, cinco das superheroínas.
Un momento da intervención da cociñeira Lucía Freitas.
Fonte: RAG
Un momento da intervención da cociñeira Lucía Freitas.
Fonte: RAG
Andrea Pousa canta durante a súa intervención na estrea.
Fonte: RAG
Antía Castro fala da súa experiencia como fotógrafa e coa lingua.
Fonte: RAG
A xornalista Esther Estévez falando da súa experiencia como parte do equipo de Dígocho Eu.
Fonte: RAG
A creadora de videoxogos Laksmy Irigoyen intervén no acto.
Fonte: RAG
O director da serie, José Manuel Diego, exalumno da USC, explica o proxecto de Superheroínas.
Fonte: RAG
Un momento da proxección da serie.
Fonte: RAG
As protagonistas seguindo a primeira proxección da serie.
Fonte: RAG
O profesor Xurxo Salgado presenta o proxecto Neofalantes.
Fonte: RAG
O vídeo da cociñeira distinguida cunha estrela Michelin pode xa verse nas páxinas web da RAG e da USC e nas súas redes sociais. Nas vindeiras semanas iranse estreando os demais episodios dunha serie que pretende “desacralizar e levar a contraria”, explica o director. “Levámoslles a contraria aos medios de comunicación porque non nos dan oco á xente nova. Ademais é un proxecto que lle leva a contraria a ese discurso de lingua como peza de museo, e é un proxecto que busca apoderar a muller, que busca amosar unha muller que usa o idioma no seu día a día”, enumera José Manuel Diego Ferreira no vídeo de presentación da serie.
A compostelá Lucía Freitas reivindica en Superheroínas o traballo feminino, a cociña galega e a lingua do país. “Cociñamos Galicia”, di da nova fornada de cociñeiros e cociñeiras de éxito. A ourensá Alba Cid, galardoada co premio nacional para poetas menores de 31 anos do Ministerio de Cultura, confesa que a escolla do galego como lingua de expresión literaria foi froito dun “exercicio de claridade e de coherencia” consigo mesma. “A min o galego abriume portas en todos os países lusófonos”, engade a cantante de Tomiño Andrea Pousa. Laksmy Irigoyen, con raíces en Salvaterra de Miño, produtora xefa do videoxogo The Waylanders, inspirado na Compostela medieval, reflexiona tamén sobre o valor engadido da lingua e da cultura propias na creación de contidos exportables e de éxito; a instagramer burelá Paula Jorge Horta réstalles importancia aos comentarios nas redes sociais baseados nos prexuízos lingüísticos; a xornalista verinesa Esther Estévez fala da súa experiencia á fronte do programa da TVG Dígocho Eu e a fotógrafa de Vedra Antía Castro, con só 22 anos a superheroína máis nova, define a lingua como a súa fonte de inspiración e parte esencial da súa identidade persoal.
Presentación ante o alumnado
O presidente da Real Academia Galega, Víctor F. Freixanes; a decana de Ciencias da Comunicación, Ana Isabel Rodríguez Vázquez; o vicerreitor de Profesorado da USC e académico correspondente, Ernesto González Seoane; as protagonistas da serie e o seu director participaron hoxe na presentación celebrada no centro. Foi un acto que contou coa asistencia do alumnado, o zume do que se nutre Novas voces para a lingua a través de traballos fin de grao, titorizados dende a propia Facultade e que contan tamén co apoio da RAG en distintas fases da produción e da realización.
“Este acordo entre a Real Academia Galega e a Facultade de Ciencias da Comunicación da USC nace coa intención de darlles voz aos novos creadores e creadoras que, no ámbito da comunicación e do audiovisual, queren amosar o seu compromiso coa lingua galega”, lembra Víctor F. Freixanes. “Escollemos alumnos e alumnas que se gradúan na facultade con TFG. Nesta segunda entrega, eliximos sete producións breves de José Manuel Diego porque reflicten unha nova realidade: mulleres novas que dende distintas actividades e coñecementos se manifestan abertamente a prol da práctica do idioma galego, algo que define con esperanza un horizonte novo”, xustifica.
O presidente da RAG agradece a implicación da decana, titora do proxecto, que na primeira edición contou coa colaboración do profesor Gaspar Broullón e desta volta coa da profesora Alba Silva. Ana Isabel Rodríguez salienta pola súa banda a confianza que a RAG depositou na Facultade, permitíndolle abrir un camiño que é “un valor engadido na motivación do alumnado ao sentirse partícipe dun proxecto que, desde a definición inicial, ten xa un marcado horizonte na difusión real”. “Isto desenvolve non só a ilusión e o interese, senón tamén a responsabilidade de aprender nas aulas todo o necesario que permita ofrecer produtos cun acabado de calidade, tanto nos contidos como na estética final. E facelo, ademais, contribuíndo a un ben final común: o compromiso coa lingua”, detalla.
O acto contou tamén coa intervención de Xurxo Salgado, profesor coordinador de Neofalantes, o proxecto que protagonizará a terceira edición de Novas voces para a lingua; e coa presenza de parte do equipo de Conseguiremos, a primeira produción da RAG e a USC no marco deste acordo. A serie, dirixida por Paula Quiroga, guionizada por Lois Alcayde e producida por Meritxell Álvarez, foi protagonizada pola futbolista Vero Boquete en conversa con Víctor Pérez Currás; os músicos Baiuca e Laura Lamontagne; o director de cine Andrés Goteira e Sara Hermo; as actrices e dramaturgas da Panadaría Teatro e o tamén actor Daniel Celester, e a psiquiatra e divulgadora científica Iria Veiga acompañada do xenetista Ángel Carracedo.
Tanto Superheroínas como Conseguiremos son proxectos realizados co apoio económico da Xunta de Galicia.
