LG_2021

Sarria abre o Ano Xela Arias cunha exposición no día do seu aniversario

Sarria inaugurou o Ano Xela Arias este xoves, día do aniversario da autora protagonista das Letras Galegas 2021, coa presentación dunha exposición centrada na súa infancia. A mostra, titulada Aquela nena de Sarria, foi promovida polo Colectivo Egeria coa colaboración do Concello de Sarria e a Real Academia Galega, e financiada pola Secretaría Xeral de Política Lingüística. A poeta, tradutora, editora e docente naceu o 4 de marzo de 1962 nesta vila luguesa, de onde eran naturais os seus pais e á que sempre permaneceu vinculada. Sarria foi, en palabras do presidente da RAG, Víctor F. Freixanes, a súa “patria da memoria, ese lugar no que se alimenta a identidade dos creadores, neste caso a lingua e os soños primeiros de Xela Arias”.

En termos semellantes falou o alcade de Sarria, Claudio Garrido; a concelleira de cultura, Reyes Abella; o secretario xeral de política lingüística, Valentín García; e o fillo da autora, Darío Gil Arias. A exposición, comisariada polo xornalista Xulio Xiz, repasa a infancia de Xela Arias e a súa produción literaria, e recolle tamén testemuños da súa familia e palabras de homenaxe en recordo da autora, que este xoves faría 59 anos. Tras a inauguración en Sarria, percorrerá a provincia de Lugo e as principais vilas de Galicia, con atención especial aos centros docentes, bibliotecas e outros espazos culturais.

A celebración do aniversario de Xela Arias contou tamén coa colaboración de Eloi Caldeiro, que presentou as primeiras gravacións do disco Tigres en equilibrio, onde pon música a poemas da escritora que foron recitados por tres poetas novos: Sonia Arias, Elena López e Iago Arias.

A corporación municipal de Sarria aprobou ademais por unanimidade rotular unha rúa principal da vila co nome de Xela Arias, que será inaugurada proximamente, e programou actos culturais que se desenvolverán ao longo de todo o ano.

Na inauguración da mostra houbo referencia especial á memoria de Valentín Arias, pai de Xela Arias, natural de Vilerma; e mais a Amparo Castaño, da casa de Mouzós (Meixende) e de Nabás (Ortoá), que asistiu ao acto acompañada dos seus fillos e netos.

Hai algúns anos na casa de Vilerma a Asociación de Escritoras e Escritores en Lingua Galega colocou unha placa na que se le: “Aquí viviron a poeta Xela Arias (1962-2003) e o escritor Valentín Arias (1934-2011), que en cada un dos seus actos afirmaron o seu amor á nosa lingua”.