Margarita Ledo, Premio de Honra Fernando Rey da Academia Galega do Audiovisual

A Academia Galega do Audiovisual (AGA) decidiu concederlle o Premio de Honra Fernando Rey 2022 á cineasta e catedrática de Comunicación Audiovisual Margarita Ledo Andión. Con este galardón recoñece unha traxectoria “comprometida coa reflexión, a creación, o feminismo e a nosa lingua”. Entre outros fitos da carreira da actual secretaria da Real Academia Galega, a AGA destaca o seu papel como impulsora da Facultade de Ciencias da Comunicación da Universidade de Santiago de Compostela, dende a que alumeou “as vocacións de varias xeracións de galegas e galegos”.

Margarita Ledo Andión recollerá o Premio de Honra Fernando Rey o vindeiro 19 de marzo. Será na gala da vixésima edición dos Premios Mestre Mateo, unha cerimonia dobremente especial para a RAG, que participará como finalista na categoría de mellor serie web con Xela Arias. A palabra esgazada.

Este recoñecemento súmase a outros como o Premio Nacional da Cultura Galega (2008), o Premio Otero Pedrayo (2017), a homenaxe da Asociación Española de Investigación da Comunicación, o galardón do Festival de Cine Europeo de Sevilla pola dirección de Nación (2020) e o Mestre Mateo ao mellor documental polo mesmo filme. 

A homenaxeada ingresou como membro de número da Real Academia Galega no ano 2009 cun discurso titulado Do bucle e da fenda. Para un ensaio crítico sobre a cultura galega.

Entrevista a Margarita Ledo na páxina web da AGA