As Letras Galegas das cantareiras, Acontecemento Musical dos Premios Opinión da Música de Raíz

Os XXV Premios Opinión da Música de Raíz distinguiron na modalidade Acontecemento Musical do ano 2025 o Día das Letras Galegas que a RAG lles dedicou ás cantareiras e á poesía popular oral. O diario La Opinión A Coruña valora con este galardón a enorme repercusión da gran festa da cultura galega do ano pasado e o que supuxo para o recoñecemento dun patrimonio cultural colectivo creado polo pobo e transmitido xeración tras xeración.

Ao abeiro das Letras Galegas 2025, personificadas nas Pandeireteiras de Mens, Rosa e Adolfina Casás Rama e Eva Castiñeira, sucedéronse por todo o país moreas de iniciativas para se sumar á celebración. Homenaxes ás cantareiras de cada parroquia, concertos e foliadas, entre outras propostas, que reforzaron a conexión entre a tradición e a modernidade que lle dá nova vida e proxecta cara ao futuro o cancioneiro popular galego.

A entrega dos XXV Premios Opinión da Música de Raíz terá lugar o vindeiro 6 de maio no Teatro Rosalía de Castro da Coruña a partir das 20:30 horas. A música será a gran protagonista da cita na que a RAG recollerá o galardón ás Letras Galegas 2025. Abrirán o acto Caamaño&Ameixeiras e Rosa Cedrón será a encargada de lle poñer o ramo.

As Tanxugueiras actuando no pleno extraordinario que a Academia celebrou en Malpica de Bergantiños co gallo do Día das Letras Galegas 2025. Fonte: RAG