“As cuestións ambientais preocupan á cidadanía galega, en coincidencia co aumento de percepción da crise climática como un problema en España e nos países europeos. O equilibrio entre desenvolvemento e sustentabilidade suscita retos, como a tensión entre, por unha banda, o obxectivo de transición das fontes de enerxía fósiles ás renovables, e pola outra os impactos negativos das instalacións no territorio”, salientan a académica Marilar Aleixandre e a académica correspondente Celia Pereira Porto, coordinadoras da xornada organizada co apoio do Concello da Coruña. Neste contexto, abordaranse, entre outras cuestións, a paisaxe e o patrimonio natural e cultural como categoría xurídica. O programa inclúe ademais a actuación musical de Faia Díaz.

A avogada do Estado Consuelo Castro Rey abrirá a tarde cunha intervención sobre a paisaxe como categoría xurídica e deseguido a académica correspondente Alba Nogueira López, catedrática de Dereito Administrativo da Universidade de Santiago de Compostela e experta en dereito ambiental, falará sobre a protección do medio na encrucillada global. O xuíz do Tribunal Superior de Xustiza de Galicia Luís Villares afondará na responsabilidade civil por danos causados por hidrocarburos na costa galega e, por último, Beltrán Puentes Cociña, profesor de Dereito Administrativo da USC, realizará unha exposición sobre economía circular cunha visión crítica do novo paradigma do dereito ambiental europeo.