O presidente da Academia participou desde a tribuna de convidados na sesión deste mércores en que os deputados e deputadas aprobaron o texto. Henrique Monteagudo confía en que, como sucedeu neste 2025 coa conmemoración do Ano Castelao, o Ano Oteriano contribúa ao mellor coñecemento do escritor, profesor, político e orador excepcional entre a mocidade e o conxunto da sociedade, case catro décadas despois de que a institución da que formou parte lle dedicase o Día das Letras Galegas en 1988.

A declaración do Parlamento de Galicia recoñece a Otero Pedrayo como “figura esencial das letras, do pensamento e da identidade galega contemporánea”. “Profesor, ensaísta, xeógrafo, novelista, político e membro destacado das Irmandades da Fala e máis tarde do Partido Galeguista, Otero Pedrayo foi un dos piares do florecemento cultural e intelectual de Galicia, representante dunha xeración que soubo vincular o galeguismo coa defensa da cultura universal e co compromiso coa nosa terra”, engade a declaración, que pode lerse na súa versión íntegra na web da Cámara galega.