Siro López profunda na invención do humorismo para a literatura na obra mestra de Cervantes

O Quixote non é só a primeira novela moderna. É a obra que sinala o nacemento da que foi unha nova forma de humor na creación literaria, a do humorismo. Afírmao o debuxante, humorista gráfico e escritor Siro López en Cervantes e o Quixote. A invención do humorismo, un ambicioso ensaio publicado nos Cadernos de Ramón Piñeiro que presentou este xoves na Real Academia Galega. A súa análise continúa a porta que deixara entreaberta Celestino Fernández de la Vega. El foi quen tratara ata o momento en España "con máis fondura e rigor" o humorismo do Quixote, un valor que, malia a súa importancia, interesou ata o momento pouco aos cervantistas, sociólogos e críticos literarios, lamenta Siro López.

Pola esquerda, Manuel González González, Xesús Alonso Montero, Siro López Lorenzo e Valentín García Gómez. Autor: RAG


Foi o propio Celestino Fernández de la Vega quen lle advertiu a Siro López, en 1972, que sería el quen tería que escribir o libro que continuase o camiño aberto polo intelectual lugués en O segredo do humor (1963). Corenta e cinco anos despois daquela conversa, o debuxante presenta un volume co obxectivo de "explicar por que e como Cervantes escribiu o Quixote como obra humorística". Está dedicado ao propio De la Vega, quen lle aprendeu "a ver a Cervantes a ler o Quixote", e a Ramón Piñeiro, a quen lle agradece que o iniciara e orientara nos estudos do humor.

Siro López estivo acompañado na presentación do seu ensaio polo académico de número e coordinador científico dos Cadernos Ramón Piñeiro, Manuel González González; o secretario xeral de Política Lingüística, Valentín García Gómez; e o presidente da Academia, Xesús Alonso Montero. "Cervantes e o Quixote. A invención do humorismo é unha desas obras que constitúen un fito para o coñecemento dun tema determinado. Tanto para os estudosos da teoría do humor como para os cervantistas vai haber un antes e un despois desta obra", salientou Manuel González González. Valentín García gabou tamén o traballo de Siro López, que mantén unha "relación moi extensa e densa" co Centro Ramón Piñeiro. "É un libro único", coincidiu Xesús Alonso Montero, quen se detivo nas achegas de Celestino Fernández de la Vega ao tema no que agora profunda o debuxante. "A partir de agora, as referencias sobre este tema serán ao libro de Siro López", concluíu.

O ensaio preséntase como achega á dúas conmemoracións: o IV centenario da morte de Miguel de Cervantes e da edición da Segunda Parte da obra desde Galicia, "onde a vivencia do humor, concretamente do humorismo, ten tanta importancia que podemos afirmar que a sensibilidade humorística é, coa saudade e co sentimento relixioso da terra, un dos factores diferenciais do ser galego".

A presentación rematou cun coloquio co público no que, entre outras cuestións, lamentou que Celestino Fernández de la Vega sexa hoxe "un gran descoñecido" e apuntou continuadores contemporáneos do humorismo do autor do Quixote: "Levado ao cine, o humor de Cervantes é o de Charlotte. Charlotte é don Quixote, un personaxe ridículo que pasa por cincuenta mil peripecias, pero que ao final remata triunfando co sorriso. Sen saír de Galicia, temos a Castelao. Non hai ningún escritor en España que estea tan próximo a Cervantes como Castelao. Os contos de Cousas e Retrincos asinaríaos Cervantes encantado da vida. Hoxe hai moitos autores autenticamente humoristas".


Público seguindo a presentación do libro. Autor: RAG
Dicionario

Novas da Academia

Subscríbete

Cursos de Verán


Toda a información
nesta páxina

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar