Académicos e académicas

Autobiografía:

Nacín en Calvelo de Maceda (Ourense) día e medio antes da Noiteboa de 1947. Realicei na escola da aldea, entre recendos de nabiña e música de carros, os estudios primarios e cursei máis tarde en Ourense o bacharelato e a carreira de Maxisterio. No corpo de mestres ingresei por oposición en 1968. Quizais tres anos antes desa data comezaran as miñas relacións coas letras ó descubrir na biblioteca unha serie de andeis reservados para libros escritos no, ata o daquela, meu ágrafo idioma. Desenvolvín o labor docente durante tres anos en Asturias, onde tamén me licenciaría en Filosofía e Letras.

En 1971 trasladeime a Galicia e exercín varios cursos en Muxía e en Ordes. Os primeiros anos deste destino fóronme especialmente intensos en ilusións no que respecta á implantación do galego como materia e mais como idioma vehicular para as Ciencias Sociais (tempos aínda no que ámbalas dúas cousas se contemplaban como utopía). Aquelas experiencias darían como froito diverso material de carácter didáctico e textos literarios que verían a luz da imprenta posteriormente, como é o caso da peciña Teatro de todo o ano (Cuadernos da Escola Dramática Galega, 1978) ou as traduccións A cabra do señor Seguín de Daudet (Grial, 46, 1974) e O testamento do tío Nacho de Angels Garriga (Cuadernos da Escola Dramática Galega, 1982).

O Premio de contos "O Facho" en 1974 e as colaboracións en Vagalume en 1975 marcaron dalgún xeito a entrada oficial na literatura infantil. Por estas datas tamén inicio a miña singradura vital con Ana Mª Fernández, persoa coa que levo compartido tantos proxectos e tantas alegrías no mundo das letras (Premio "O Facho" de teatro de 1983, "O Barco de Vapor" de 1985 e 1989, etc.).

En 1982 consigo as oposicións a cátedras de Lingua e Literatura Galega para institutos de ensino medio, circunstancia que me obriga a cambiar de destino docente. A comezos dos noventa volvo os ollos cara a Asturias, pero, desta vez, para desenvolver un estudo sobre a súa franxa lingüística máis occidental, co que obteño o grao de doutor en 1994. As vivencias nas terras do Navia traduciríanse tamén en abundantes escritos destinados ó público infantil destas comarcas, moitos deles aínda inéditos.