O concurso de microrrelatos da RAG e PuntoGal repartirá máis agasallos entre participantes de todas as idades

A Real Academia Galega e a Asociación PuntoGal convocan a segunda edición do certame de microrrelatos que crearon en 2018 co obxectivo de reforzar a presenza da lingua e da identidade propias no mundo dixital. O prazo de presentación dos textos, dun máximo de 200 palabras, permanecerá aberto durante o mes de febreiro, cadrando coa campaña de promoción de PuntoGal que permitirá rexistrar un dominio .gal para dous anos a un prezo de 15 euros máis IVE.

Pola esquerda, Darío Janeiro, Víctor F. Freixanes e Manuel González na presentación da nova edición do concurso de microrrelatos. Fonte: RAG


O presidente da Real Academia Galega, Víctor F. Freixanes, e o presidente e o director xeral de PuntoGal, o académico de número Manuel González e Darío Janeiro, presentaron este mércores na sede da Academia a convocatoria, coa que agardan repetir e mesmo mellorar o éxito de participación da primeira edición do certame, que sumou case 400 orixinais. As bases do certame están dispoñibles nesta ligazón.

En 2018 o concurso concedeu un primeiro premio, un segundo premio e tres terceiros premios. Aínda que dous terceiros premios os gañaron dous menores, a maioría dos concursantes eran maiores de 18 anos. Nesta ocasión repartiranse nove premios, tres en cada unha das novas categorías distribuídas por idades co propósito de facilitar a participación de todo o público. Na infantil poderán participar nenos e nenas de ata 11 anos; na xuvenil, mozos e mozas de 12 a 17 anos; e na de adultos, calquera persoa maior de idade.

As persoas que desexen participar no concurso deberán enviar os textos, de ata 200 palabras e en galego, ao correo electrónico actividades@academia.gal entre os días 1 e 28 de febreiro. Os gañadores recibirán distintos premios tecnolóxicos –ordenadores, consolas, lectores electrónicos de libros- e relacionados coa lectura. As bases completas e a lista de premios están dispoñibles nas web da RAG e na de PuntoGal, www.asociacion.gal.

Cadrando coa acción, o dominio lanza ademais unha promoción que posibilitará rexistrar durante o mes de febreiro un novo .gal con prezos de entre 12,15 e 15 euros máis IVE. Os rexistradores acollidos á promoción son dinahosting, Com Laude, Entorno Digital, Don Dominio, Ovh.com e Openprovider. As condicións da promoción poden consultarse en dominio.gal/promotion/ ou dirixíndose directamente ás empresas rexistradoras. O dominio lanzará unha campaña de publicidade para dar a coñecer tanto esta acción como o concurso.

Un espazo de modernidade para a lingua
O presidente da RAG, Víctor Freixanes, sinalou na presentación do certame a importancia da presenza da lingua e da cultura galegas na Rede e gabou o papel que o dominio .gal xoga na súa proxección. "A Real Academia Galega entende a lingua como un factor de modernidade. O idioma galego é un termómetro para medir os momentos históricos nos que a sociedade galega se sente dona do seu e ilusionada cun proxecto de futuro. O futuro da lingua, da cultura galega e a propia Galicia pasa por estar presente nas novas tecnoloxías da comunicación, e a iniciativa .gal constitúe un dos elementos máis ilusionantes desa proxección nos últimos tempos", expresou.

O presidente de PuntoGal, Manuel González, salientou na mesma liña a vontade de colaboración desta entidade coa RAG e outros axentes preocupados pola cultura do país. "O dominio PuntoGal leva no seu ADN a promoción e a difusión da lingua e cultura galegas en todo o ciberespazo, pero tamén leva no seu ADN o espírito de colaboración con todos os axentes que contribúen a que a sociedade galega se sinta orgullosa de si mesma, e neste aspecto a RAG ocupa un lugar de privilexio. Por iso queremos camiñar da man e sumar esforzos. A convocatoria deste concurso é unha pequena mostra deste espírito de colaboración", declarou.

O director xeral de PuntoGal, Darío Janeiro, incidiu tamén na estreita relación entre o dominio .gal e a RAG, "entidade vinculada dende os seus inicios a este proxecto, con quen compartimos a defensa da lingua e a cultura galegas". Janeiro enmarcou a segunda edición do certame nos proxectos colaborativos da asociación, que "PuntoGal ten a intención de aumentar e diversificar durante 2019".

Ao respecto da campaña de promoción, o director xeral de PuntoGal explicou que se trata dunha iniciativa que permite obter un .gal a un prezo "moi accesible e durante dous anos". "Agardamos superar en breve a barreira dos 5.000 dominios rexistrados, o que nos facilitará mellorar os prezos e continuar a política de promocións periódicas", rematou.

O incremento de dominios .gal permitirá ir reducindo progresivamente o seu prezo de adquisición e renovación. PuntoGal, entidade sen ánimo de lucro, reinviste os beneficios que obtén da súa xestión en actividades de fomento da cultura, a lingua e a tecnoloxía en Galicia e en galego. A súa última colaboración foi a tradución ao galego do navegador de Internet Firefox.

Dicionario
Axenda de actos Ver todos
Luns 16 de decembro de 2019 / 14:30 h
Charla da campaña Toponimízate - Folgoso do Courel
Martes 17 de decembro de 2019 / 15:45 h
Charla da campaña Toponimízate - Cerdedo-Cotobade
Xoves 19 de decembro de 2019 / 12:30 h
Charla da campaña Toponimízate - Pazos de Borbén
Venres 27 de decembro de 2019 / 20:00 h
Charla da campaña Toponimízate - Vilalba

Novas da Academia

Subscríbete