Ao se cumprir vinte anos da creación da Real Academia Galega, o seu principal obxectivo, o dicionario, seguía sen estar rematado. A necesidade social de posuír unha obra lexicográfica era cada vez máis patente, e para encher este baleiro comezan a aparecer os anuncios de distintas publicacións. Así, a editorial Lar, propiedade de Leandro Carré Alvarellos e Ánxel Casal, anuncia nos primeiros meses de 1926 a saída do dicionario do primeiro. En 1928 aparecerá o primeiro volume e haberá que agardar até 1931 para ter o segundo.

"Un dicionario galego". A Nosa Terra. 221 (1/II/1926), p. 4. Real Academia Galega. Hemeroteca
Diccionario galego-castelán (1928), de Leandro Carré Alvarellos. Real Academia Galega. Biblioteca

É probable que a curiosidade lexicográfica de Eladio Rodríguez nacese vencellada á elaboración do dicionario da Academia, xa que se adoita datar entre 1907 e 1911 o comezo dos labores na súa propia obra, período no que participa na Comisión clasificadora. En 1927 a prensa anuncia a creación da editorial Nós e avanza a publicación do Dicionario de Eladio Rodríguez nela. Malia un novo intento de publicación en 1933, non será até 1958, da man de Galaxia, que vexa a luz.

Diccionario enciclopédico gallego-castellano (1958). Eladio Rodríguez. Real Academia Galega. Biblioteca
"La editorial Nós. En beneficio de la cultura gallega". El pueblo gallego. 14/VIII/1927. Galiciana 

Da mesma época son outras iniciativas como o Vocabulario popular galego-castelán de Filgueira, Tobío, Magariños e Cordal Carús, publicado por entregas en El Pueblo Gallego (1926), e o encargo de elaboración dun dicionario galego aos membros da sección rexional galega da Real Academia Española, Ramón Cabanillas e Cotarelo Valledor.

Vocabulario popular galego-castelán (1926). Real Academia Galega. Biblioteca
"Peneirando". A Nosa Terra 249 (1/VI/1928)., p. 9. Real Academia Galega. Hemeroteca

En vista de que a Comisión do Dicionario creada en 1924 era puramente nominativa e que César Vaamonde seguía a ser realmente o único encargado da obra, un grupo de académicos presenta a proposta de que na portada do Dicionario se consigne o nome do seu compilador e redactor, co obxecto de recoñecer publicamente o seu traballo e, probablemente, para suavizar o impacto da noticia da publicación do dicionario do presidente da Academia. O cambio era transcendente, xa que se pasaba de editar un dicionario institucional, con valor de norma do idioma, a avalar a obra persoal dun académico correspondente.

Sección oficial. Junta ordinaria del 22 de mayo de 1928. BRAG. 212 (1/I/1929), p. 164.

Entre medias, a Xunta de Goberno encargoulles un informe ao respecto a Manuel Amor Meilán e a Indalecio Varela Lenzano, que presentaron o 23 de xullo de 1928. Segundo eles, o Dicionario debía ser continuado pola mesma persoa que o comezou e co mesmo criterio, e recomendaban extinguir a Comisión do Dicionario. Este proposta apróbase na xunta do 12 de decembro de 1928: a Academia dáballe plena autonomía a Vaamonde Lores para continuar co agora “seu” dicionario. Porén non se volverá publicar ningún outro caderno e, anos máis tarde, a Academia tería que mercarlle á familia de César Vaamonde as papeletas do dicionario para poder recuperalas.

Extracto do informe de Amor Meilán e Varela Lenzano (1928). Isabel Seoane “Eladio Rodríguez González e o primeiro diccionario da Real Academia Galega”. BRAG. 362 (2001), 97-133