O alcalde, Ángel Moldes Martínez, e a concelleira de Cultura, Natalia Sabarís, presentarán a charla que impartirá Vicente Feijoo Ares, coordinador técnico de Galicia Nomeada e do Seminario de Onomástica da Real Academia Galega. Entre outras cuestións, o filólogo explicaralle á veciñanza o funcionamento da plataforma Galicia Nomeada, que permite que particulares e asociacións participen na recolla da microtoponimia da súa terra. Ademais de engadir calquera nome e xeorreferencialo, dende a aplicación para móbiles ou na versión de escritorio, Galicia Nomeada permite acompañar este rexistro de audios coa súa pronuncia, subir imaxes do lugar ou enviar suxestións sobre a toponimia xa engadida no visor.

O forte desenvolvemento urbano que está a vivir Poio fai necesaria a tarefa de recolla da súa microtoponimia. Esta urxencia é compartida por Claudio Quintillán Vallejo, secretario da Organización Galega de Comunidades de Montes e da Asociación Irmandade Illa de Tambo, quen lle mostrou á RAG o seu interese en levar adiante un proxecto de recolla toponímica en Poio.

Combarro e as formas curvas
A sesión deste sábado contará tamén cunha parte na que se falará dos topónimos que foron obxecto dun novo ditame no Nomenclátor de Galicia 2026 (recentemente aprobado pola Xunta de Galicia), e coa explicación da orixe e no significado do nome de Poio e das súas parroquias. Este apartado conta co apoio na investigación das etimoloxías do académico e profesor da Universidade de Vigo Gonzalo Navaza. Un dos moitos topónimos dos que falará Vicente Feijoo será Combarro, que Poio comparte con outros sete municipios galegos. O nome provén dunha raíz prerromana moi antiga *CAMB- / COMB- co significado de 'curvo' e que podería facer referencia á enseada ou curva mariña sobre a que se atopa esta localidade.