Baixo o título Mil son eu tan só, tan soa, o programa que coordinan as académicas Margarita Ledo Andión e Ana Romaní arrincará o martes 19 de novembro con dous relatorios da poeta Eva Veiga e o músico Paulino Pereira. A primeira xornada continuará cunha mesa redonda coa crítica literaria e profesora da USC María Xesús Nogueira, o académico correspondente e profesor honorario da UDC Luciano Rodríguez e a escritora e profesora da UVigo Rexina R. Vega. A tarde rematará cunha intervención da fotógrafa Maribel Longueira arredor de Papagaio, o volume no que as súas instantáneas sobre o derrubamento do antigo barrio da prostitución coruñés dialogan cos versos da homenaxeada.

O mércores 20 de novembro a filóloga e ensaísta Inmaculada Otero Varela afondará na narrativa de Luísa Villalta e o escritor e crítico literario Henrique Rabuñal, na súa obra dramática. Deseguido a académica Chus Pato, Estíbaliz Espinosa e Tamara Andrés, tres poetas de diferentes xeracións, comporán unha mesa redonda, moderada pola académica correspondente Mercedes Queixas, na que reflexionarán sobre o feito de ler a Villalta. A segunda xornada concluirá coa actuación musical de Uxía.

O poeta Xosé Mª Álvarez Cáccamo e a profesora honoraria da UDC Pilar García Negro ofrecerán o xoves 21 senllos relatorios sobre a lírica e o ensaio da homenaxeada. A tarde avanzará cunha mesa redonda sobre a cidade da Coruña na obra de Luísa Villalta protagonizada por Teresa Seara, Xurxo Souto e Miguel Anxo Fernán Vello, e con Cesáreo Sánchez Iglesias como moderador. Poralle o ramo ao simposio Indóciles, a proposta multidisciplinar de Vero Rilo, Nuria Vil e Mónica de Nut arredor da vida e da literatura da protagonista destas Letras Galegas.

O Simposio Luísa Villalta é unha iniciativa da Real Academia Galega organizada co apoio da Xunta de Galicia, o Ministerio de Ciencia, Innovación e Universidades e a Fundación Barrié. A entrada é libre ata completar a capacidade da sala. Todas as sesións poderán seguirse en directo dende academia.gal.

Premios Contádenos o voso Día das Letras
A Real Academia Galega entregará o vindeiro martes, 22 de outubro, os premios do concurso escolar Contádenos o voso Día das Letras de Luísa Villalta, convocado ao abeiro do proxecto Primavera das Letras, nun acto que terá lugar na Casa da Cultura de Sada. A institución premiou as contribucións protagonizadas polo alumnado de tres centros de ensino: o CEIP Sada y sus Contornos (Sada), do Colexio Fogar de Santa Margarida (A Coruña) e mais do CEIP da Espiñeira-Aldán (Cangas).