Manuel Rivas acada o Premio da Crítica con 'Tras do ceo'

Os Premios da Crítica aos mellores libros publicados no ano 2024 recoñeceron o pasado sábado, na modalidade de narrativa en galego, Tras do ceo (Xerais), do académico Manuel Rivas (A Coruña, 1957). A novela, segundo destaca o xurado, supón “o reencontro cunha voz absolutamente canónica que aquí demostra, unha vez máis, a súa asombrosa capacidade de evolucionar permanecendo fiel a un proxecto literario propio, singularísimo e inconfundible”. Na modalidade de poesía en galego, a obra premiada é Poemas realistas (Apiario), de Daniel Salgado (Monterroso, 1981).

O título da última novela de Manuel Rivas alude ao lugar onde transcorre a acción, “que se resiste á identificación referencial e, ao tempo, epítome de moitas das Galicias reais e posibles”. “As clásicas preocupacións do autor -a violencia e o poder como vectores estruturantes das relacións interpersoais, a destrución do hábitat- reaparecen nun relato de elevada intensidade emocional compensada con ben dosificadas doses de ironía e enxeño”, engade o xurado.

Na véspera da resolución dos Premios da Crítica, organizados dende 1956 pola Asociación Española de Críticos Literarios, Manuel Rivas recolleu o Premio Cedro 2025, nunha cerimonia celebrada no Ateneo de Madrid. O académico advertiu no seu discurso que “sen ética nin regulación, a intelixencia artificial pode ser un espolio cultural”.