Homenaxe a Xesús Alonso Montero no seu 90 aniversario

O auditorio Afundación de Vigo acollerá o sábado 1 de decembro, ás 12:00 horas, unha homenaxe a Xesús Alonso Montero co gallo do seu 90 aniversario. A Asociación Premios da Crítica de Galicia organiza esta celebración, na que colaboran as tres universidades, o Consello da Cultura Galega e a Real Academia Galega, institución da que é membro desde 1993 e que presidiu entre 2013 e 2017.

O acto no auditorio vigués de Afundación (rúa Policarpo Sanz, 24-26), de entrada libre ata completar capacidade, terá unha primeira parte de carácter literario e rematará coa proxección da película documenta Cidadán Alonso Montero, o mestre das palabras de Xan Leira. A xornada continuará cun xantar de irmandade. Máis información no teléfono 629 587 807 e en www.premiosdacritica.org.

A homenaxe terá lugar na mesma cidade onde Xesús Alonso Montero naceu o 28 de novembro de 1928 e onde reside. Licenciado en Filosofía e Letras na Universidade Central de Madrid e doutor pola de Salamanca coa tese Lengua y estilo de Curros Enríquez en su poesía gallega (1966), tras impartir docencia como catedrático de ensino secundario incorporouse á Universidade de Santiago de Compostela, onde chegou a ser catedrático de Literatura Galega no ano 1991. A súa obra abrangue un amplo abano de temas que van desde a literatura á sociolingüística e á historia de Galicia.