Carballo, a localidade onde vivía Fernando Cabeza Quiles, rendeulle homenaxe ao colaborador do Seminario de Onomástica da Real Academia Galega, que perdeu a vida o pasado 1 de maio. Tras o acto de lembranza organizado por Espiral Maior o pasado 20 de xuño baixo o título O sabio de nós, o programa Voces de Bergantiños de Radio Voz dedicoulle o pasado 11 de xullo o programa de celebración dos 20 anos deste espazo nas ondas ao investigador, gran estudoso e divulgador da riqueza dos nomes da terra de Galicia. A secretaria da RAG e compañeira de especialidade, Ana Boullón, participou na emisión en directo dende a Praza dos Libros de Carballo.