Bergondo lembra a Filomena Dato, voz do feminismo galeguista do XIX

A Real Academia Galega participará o vindeiro 26 de febreiro na homenaxe que se lle renderá a Filomena Dato Muruais (Ourense, 1856 - A Coruña, 1926) no cemiterio de Moruxo (Bergondo) na véspera do seu 92 cabodano. A coñecida como a poeta das Mariñas foi membro correspondente da institución desde a súa constitución en 1906. A Academia colabora neste acto organizado polo Concello de Bergondo, a Asociación Cultural Irmáns Suárez Picallo e a Asociación Lisístrata para recordar a quen foi unha das escasas autoras femininas e feministas da Galicia de finais do século XIX.

O acto terá lugar a partir das 11:15 horas no camposanto de Moruxo, onde Filomena Dato foi despedida en 1926 nunha cerimonia á que acudiron destacados membros da vida cultural e política daquel momento, entre eles o presidente da RAG e o alcalde da Coruña. A autora convertérase nos anos oitenta do século XIX nunha das voces principais que se fixo oír en defensa das mulleres desde o galeguismo, unha postura que mantivo como oradora e tamén na súa obra escrita. Exemplo dela é o poema "En defensa das mulleres", premiado en 1887 no certame literario convocado en Ourense e recollido catro anos despois en Follatos.

A homenaxe a Filomena Dato terá carácter interxeracional. Tras as intervencións do párroco Rubén Aramburu, a Asociación Cultural Irmáns Suárez Picallo, Ana Hermida, da Asociación Lisístrata, a poeta e editora Dores Tembrás, o presidente da RAG, Víctor F. Freixanes, e a alcaldesa de Bergondo, Alejandra Pérez Máquez, alumnas e alumnos de 2º da ESO do CPI Cruz do Sar lerán poemas da escritora. A celebración rematará co descubrimento dunha escultura na honra de Filomena Dato asinada por Francisco Escuredo e a interpretación do Himno galego a cargo de José Otero López.