Os documentos dixitalizados desta volta súmanse a outros 2.500 reproducidos en 2024, nunha primeira fase que comprendeu os primeiros anos da Academia, desde a súa constitución en 1905. Estes papeis serán parte destacada da documentación que se empregue en 2026 na celebración dos 120 anos da RAG para trazar un percorrido divulgativo sobre a historia da institución.
A relacións nas primeiras décadas do século XX entre os membros da Academia e outras organizacións e movementos como as Irmandades da Fala e o Seminario de Estudos Galegas; os atrancos para manter a actividade cultural durante as ditaduras de Primo de Rivera e Franco; as estratexias para preservar a lingua nun contexto hostil e mais os contactos mantidos pola RAG con escritores, investigadores e entidades culturais e sociais doutros territorios da Península Ibérica son parte dos asuntos que se abordan nesta documentación de enorme valor para a historia da Academia e de Galicia.
Mención especial merece a interacción coa diáspora galega en América, que foi determinante para o financiamento e o apoio á Real Academia Galega desde a súa xestación e posterior posta en marcha, sen esquecer os propios debates internos sobre publicacións e proxectos da RAG ou arredor da creación dunha norma para a lingua galega.
Autores coma Vicente Risco, Afonso Daniel Rodríguez Castelao, Eduardo Pondal, Ramón Otero Pedrayo ou Emilia Pardo Bazán, así como diversos académicos, desde o seu primeiro presidente, Manuel Murguía, a Manuel Casás ou Martínez Salazar protagonizan estas páxinas canda outras figuras sobranceiras da cultura quer estatais, quer internacionais, achegando información de relevancia sobre unha época de difícil acceso para os historiadores, aínda a día de hoxe.
A dixitalización desta correspondencia histórica garante a preservación dos documentos e facilita o acceso a eles a toda a comunidade investigadora interesada no estudo da historia da RAG e do galeguismo. A empresa UNAYTA Oficina Sin Papeles, S.L foi a encargada do escaneado en alta resolución de todas as cartas nas propias instalacións temporais da Academia.
