A RAG participa na Universitat d'Alacant no IV Seminari Internacional de Sociolingüística

Os técnicos do Seminario de Sociolingüística da Real Academia participaron esta semana no IV Seminari Internacional de Sociolingüística da Universitat d'Alacant. Xaquín Loredo e Gabino Vázquez-Grandío interviñeron no encontro, organizado coa colaboración, entre outras institucións, da RAG e de Estandarev, a rede de Estandarización Lingüística Revisitada, da que a Academia é entidade promotora e observadora. O encontro deste ano tivo como eixe temático as ideoloxías lingüísticas.

Xaquín Loredo e Gabino Vázquez-Grandío con compañeiros do grupo de investigación de Estandarev no Seminari Internacional de Sociolinguística

Xaquín Loredo participou nunha mesa redonda de ideoloxías sobre o multilingüismo canda Carles Segura, catedrático de multilingüismo da Universitat d’Alacant; Sandra Monserrat, profesora de filoloxía catalá da mesma institución; e María Méndez Santos, organizadora do seminario e investigadora tamén na universidade anfitrioa. O sociolingüista centrou a súa intervención na evolución da conceptualización da diversidade lingüística dende os modelos bilingües ata á perspectiva plurilingüe actual.

Gabino Vázquez-Grandío levou ao seminario a comunicación titulada Do bilingüismo harmónico ao plurilingüismo. A pegada da política educativa nas ideoloxías lingüísticas en Galicia, na que abordou a evolución do modelo lingüístico na educación formal de Galicia, poñéndoa en relación cos cambios sociais e políticos, e mais os marcos ideolóxicos de cada momento histórico.