Presentación de 'María Victoria Moreno. A proeza da súa vida e da súa literatura'

Xesús Alonso Montero é o autor do volume sobre María Victoria Moreno que se distribuirá este xoves con La Voz de Galicia, presentado hoxe na sede da Real Academia Galega. O académico defíneo como unha biografía intelectual e cívica da protagonista do Día das Letras Galegas 2018, a quen coñeceu como compañeira de seminario no Instituto Masculino de Lugo en 1965. Nestas páxinas detense en todos os perfís da autora, "a profesora, a filóloga, a dicidora (mellor que a oradora), a narradora, a ensaísta, a comentarista de textos literarios e a persoa fondamente comprometida coa causa dunha lingua que, aparentemente, non era súa".

Un momento da actuación musical de Antía Ameixeiras. Fonte: RAG


Xesús Alonso Montero presentou a biografía acompañado polo director de La Voz de Galicia, Xosé Luís Vilela, e o presidente da RAG, Víctor F. Freixanes, nun acto no que alumnas e alumnos do CEIP Cidade Vella da Coruña leron fragmentos da obra da autora que será homenaxeada o vindeiro 17 de maio. A presentación empezou coa interpretación dunha peza musical a cargo de Antía Ameixeiras, que fixo tamén soar o Himno co seu violín para pechar o acto.

O autor da biografía recordou que a protagonista do Día das Letras Galegas 2018 naceu en Estremadura, medrou en terras de castela, estudou bacharelato en Barcelona e a carreira en Madrid e chegou a Galicia en 1963. Xesús Alonso Montero coñeceuna en 1965 cando chegou a Lugo para impartir clases de Lingua e literatura españolas e alí, onde permaneceu dous cursos, foi onde agromou a súa conciencia lingüística ata chegar a facer do galego poucos anos despois o seu idioma de expresión non só vital, senón tamén literaria. María Victoria Moreno fixo ademais un auténtico "apostolado lingüístico" impartindo cursos de galego durante o franquismo.


Pola esquerda, Xosé Luís Vilela, Víctor F. Freixanes e Xesús Alonso. Fonte: RAG


Este compromiso coa lingua desde a ditadura, lembrou na súa intervención o director de La Voz de Galicia, chegou a custarlle a retirada do pasaporte. Xosé Luís Vilela fixo mención especial a unha das novelas de María Victoria Moreno, Anagnórise, unha obra "que nos axudou a quen a lemos cos nosos fillos antes de chegaren á adolescencia", dixo.

O presidente da RAG recordou a vocación docente da homenaxeada e agradeceu especialmente a participación do alumnado do CEIP Cidade Vella da Coruña, "o osíxeno novo que tanto demandamos e necesitamos".

Dicionario
Axenda de actos Ver todos
Sábado 20 de outubro de 2018 / 9:30 h
III Xornada de Onomástica Galega: Os alcumes
Martes 23 de outubro de 2018 / 19:00 h
Conferencia de Carlos Núñez: O éxito da "marca celta" e a súa profundidade
Mércores 24 de outubro de 2018 / 19:00 h
Presentación do novo número da revista da Casa-Museo Emilia Pardo Bazán
Martes 27 de novembro de 2018 / 16:30 h
Simposio María Victoria Moreno
Mércores 28 de novembro de 2018 / 16:30 h
Simposio María Victoria Moreno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar