Os colexios Saco e Arce, Marcos da Portela e Fernández Latorre gañan o concurso Contádenos o voso Día das Letras

Os colexios Saco Arce de Toén (Ourense), Juan Fernández Latorre (A Coruña) e Marco da Portela (Pontevedra) son os gañadores da última edición de Contádenos o voso Día das Letras Galegas. Os tres centros participaron no concurso da Real Academia Galega con traballos arredor da vida e da obra de Ricardo Carballo Calero que implicaron a participación do alumnado e das familias durante o confinamento e a desescalada, e que constitúen unha boa mostra do esforzo que realizou o conxunto da comunidade educativa galega para celebrar as Letras Galegas 2020 en plena pandemia. Tampouco faltaron materiais elaborados polo profesorado para facilitar a celebración dende os fogares. Os colexios gañadores serán premiados con lotes de libros para dotaren as súas bibliotecas.
Dramatización de As pitas baixo a chuvia do alumnado do CEIP Juan Fernández Latorre


Un total de oitenta centros de educación infantil e primaria de toda Galicia concorreron á última edición de Contádenos o voso Día das Letras, o concurso creado pola RAG en 2017 ao abeiro do proxecto Primavera das Letras. Dende esta páxina web, a RAG, co apoio da Deputación da Coruña, fornece a comunidade educativa de recursos lúdicos e didácticos para achegar os nenos e nenas á figura á que cada ano se lle dedica o 17 de maio. As propostas presentadas desenvolvéronse nesta edición tanto na primavera, durante o primeiro estado de alarma, como no outono, cadrando coa extensión da celebración por parte da Real Academia Galega por mor da pandemia.

O CEIP Saco e Arce de Toén participou cunha das iniciativas máis orixinais para achegar os nenos e nenas á vida e á obra de Carballo Calero. O profesorado animou o alumnado a profundar na súa vida e no seu legado literario e a localizar en Ourense a rúa dedicada ao filólogo e escritor. Unha vez atopada, os nenos e nenas deixaron nela debuxos, poemas e outras creacións a modo de homenaxe.

O resultado pode verse nun vídeo de resumo no que Xoana fala da súa lectura de As pitas baixo a chuvia, Pablo e a súa nai len un fragmento do mesmo relato, e Noa, Aixa e Luán recitan versos do escritor na rúa do autor. Outros compañeiros levaron a rúa Carballo Calero ata as súas casas e comparten tamén lecturas do escritor nun vídeo que remata con fotografías que ilustran máis homenaxes da comunidade educativa. A CEIP Saco e Arce compartiu ademais a actividade con outros colexios galegos pedíndolles que se sumasen a esta iniciativa dende as demais rúas de Galicia que levan o nome de Carballo Calero. Os nenos e nenas de infantil deste colexio tamén participaron nas Letras Galegas 2020 ilustrando As pitas baixo a chuvia. Por último, as familias celebraron o 17 de maio con música tradicional.

As contribucións do CEIP Juan Fernández Latorre son outro bo exemplo do gran labor do profesorado e das familias durante o confinamento para facer realidade a celebración das Letras Galegas. Entre outras propostas, o alumnado de 5 anos gravou dende a casa unha dramatización do devandito relato, inspirado na infancia do autor e moi empregado nas aulas do alumnado de infantil o do primeiro ciclo de primaria de toda Galicia pola súa idoneidade para estas etapas. O equipo de dinamización lingüística tamén se implicou de cheo na celebración e preparou dous xogos sobre Carballo Calero, baseados no xogo da ruleta e nos birlos.

Os fogares foron de igual xeito o escenario da celebración das Letras Galegas 2020 da comunidade educativa do CEP Marcos da Portela. O alumnado deste colexio pontevedrés percorre a biografía de Carballo Calero, recita poemas e le outros fragmentos da súa obra nun dos vídeos gravados durante o confinamento, no que tamén participa o profesorado. Outra peza ofrece unha adaptación do relato As pitas baixo a chuvia, neste caso da intérprete de lingua de signos do centro; e o equipo de dinamización lingüística preparou tres Pasapalabras sobre o autor adaptados a cada un dos ciclos de primaria.

Dicionario

Novas da Academia

Subscríbete