Alumnado, profesorado e representantes das institucións que colaboran nos Cursos de lingua e cultura galegas posan ás portas da Facultade de Filosofía na xornada inaugural
O alumnado desta nova edición chega a Santiago de Compostela, onde se desenvolven os cursos, procedente de Alemaña, Austria, Brasil, Reino Unido, Canadá, República Checa, Chile, Croacia, Cuba, Estados Unidos, Hungría, India, Italia, México, Polonia, Romanía, Portugal, Ucraína, Xapón e doutras autonomías do Estado español. Na inauguración, celebrada este mediodía na Facultade de Filosofía da USC, xunto ao presidente da RAG, tamén lles deron a benvida o secretario da RAG e codirector dos cursos, Henrique Monteagudo; o director do ILG, Ernesto González Seoane; a vicerreitora de Servizos Universitarios do Campus de Lugo, María do Carme Silva Domínguez; o secretario xeral de Política Lingüística, Valentín García; e a vicepresidenta da Deputación da Coruña, Goretti Sanmartín.
Fiando o discurso co poema de Álvaro Cunqueiro inspirado nas cantigas de amigo, "Amiga, namorado vou", o presidente da Academia mostrouse convencido de que, como sucede xa desde hai tres décadas, o alumnado deste ano marchará de Galicia amando a súa lingua e a súa cultura. "Estou seguro de que cando vaiades polo mundo adiante levaredes saudade de nós, morriña de nós", expresou Víctor F. Freixanes.
O coordinador dos Cursos, Henrique Monteagudo, explicou previamente os detalles organizativos dun programa "con vocación de saír ao encontro de moitas culturas" que ten "grande importancia para a normalización lingüística". "Vós sodes exemplo para o propio país de que temos que apreciar este patrimonio que é de noso, pero que queremos compartir convosco e que non se esfarele", subliñou.
Na mesma liña, o director do ILG, Ernesto González Seoane, recordou que o programa naceu en 1988 coa vontade de difundir a cultura e a lingua galegas polo mundo adiante e "tender pontes e fomentar a comunicación" con outras. "Como pobo, somos depositarios deste legado e debemos non simplemente preservalo, senón tamén compartilo cos demais pobos do mundo", engadiu. Un obxectivo hoxe favorecido "nun mundo cada vez máis pequeno no que a interacción afortunadamente cada vez é máis intensa", engadiu o secretario xeral de Política Lingüística, Valentín García.
A vicepresidenta da Deputación da Coruña, Goretti Sanmartín, agradeceu o papel de "embaixadores culturais" do alumnado dos Cursos Galego sen fronteiras e tamén valorou a importancia dentro de Galicia do exemplo que dan: "Vides sen os preconceptos cara ao galego, utilizádelo con toda normalidade e defendédelo con todo o entusiasmo". A vicerreitora María do Carme Silva tamén agradeceu que os e as estudantes destes cursos chegue sempre "libre de prexuízos e cheo de entusiasmo". "A experiencia de darlle clase a un alumnado co voso perfil é unha das máis gratificantes que se pode ter", engadiu lembrando a súa participación como docente na terceira edición.
As clases teóricas e prácticas desenvolveranse ata o 24 de xullo na Facultade de Filosofía e combinaranse con obradoiros de música e baile e palestras impartidas por persoas do mundo da literatura, a música ou a arte dramática. Unha charla-concerto de Uxía Senlle e Sérgio Tannus, un espectáculo sobre Carlos Casares a cargo do actor Avelino González, unha conversa co actor Luís Iglesias, unha charla-recital da poeta e académica electa Chus Pato, un percorrido pola cultura na Rede da man do director de culturagalega.gal, Manuel Gago, ou un encontro coa poeta Rosalía Fernández Rial son tamén parte do programa.
Os participantes poderán ademais gozar dunha visita á Casa-Museo Rosalía de Castro, guiada por Anxo Angueira, que concluirá cunha conferencia da profesora Catherine Davies, directora do Instituto de Investigación en Linguas Modernas da Universidade de Londres.
Máis información na bitácora http://cursoslinguagalega.academia.gal/
