Margarita Ledo recolle o premio Luís Porteiro Garea á promoción do uso do galego

Margarita Ledo recolleu o pasado venres o premio Luís Porteiro Garea á promoción e uso do galego na Universidade de Santiago de Compostela. A secretaria da Real Academia Galega é a primeira muller galardoada con este recoñecemento que leva o nome do profesor que impartiu, o 16 de setembro de 1915, a primeira lección en galego na historia da USC da que se ten constancia. “Son innúmeros os vestixios, os sinais luminosos que dende estudante Porteiro Garea inscribe na intrahistoria da USC”, salientou a catedrática emérita, que tamén lembrou a xénese do seu propio vínculo coa lingua. “Digo sempre que a lingua foi o modo-punky de me rebelar, anos de estudante de xornalismo en Barcelona, 1969 en diante, co que tiña máis a man: escribir poemas, para facelo en galego”, explicou.

Margarita Ledo posa co premio Porteiro Garea. Autor: Santi Alvite

O presidente da Real Academia Galega, Víctor F. Freixanes, trazou o perfil biográfico da premiada nun acto no paraninfo da USC presidido polo reitor Antonio López e no que tamén interviñeron a alcaldesa de Santiago de Compostela, Goretti Sanmartín; e o director do Servizo de Normalización Lingüística da USC, Manuel Núñez Singala.

Víctor F. Freixanes louvou a traxectoria da profesora Ledo e salientou o traballo que desenvolveu na posta en marcha a Facultade de Ciencias da Comunicación, un “proxecto complexo e esixente” ao servizo da lingua galega que permitiu abrir un novo horizonte”. O reitor Antonio López referiuse na mesma liña ao feito de que este centro sexa o que conta cunha maior porcentaxe de docencia en galego, un feito que, considerou, ten que ver coa pegada da catedrática de Comunicación Audiovisual na xénese da facultade. “Santiago non sería o mesmo sen Margarita Ledo e o seu compromiso coa lingua”, engadiu a alcaldesa Goretti Sanmartín.