A Sección de Historia da Real Academia Galega organiza estes encontros co propósito de convidar a reflexionar sobre o que motiva a aparición destas e doutras celebracións que teñen en común a reconstrución de feitos históricos máis ou menos remotos, sobre o proceso social e cultural que as explica o sobre o asentamento e a relevancia que teñen para a proxección da historia no espazo público. O programa coordinado polo seu director, o académico Ramón Villares, toma prestado o seu nome da expresión popularizada polos historiadores Eric Hobsbawn e Terence Ranger na obra homónima A invención da tradición, editada por primeira vez en 1983 e convertida nun clásico. Os estudosos británicos sinalan nestas páxinas o interese específico que teñen para os historiadores as tradicións inventadas, que “normalmente intentan conectarse cun pasado histórico”.
Canda Luis Domínguez, na sesión de mañá o público poderá escoitar a Manuel Gago expondo as orixes da Romaría Vikinga de Catoira e interpretando os cambios que foi sufrindo dende entón. “Empezou a celebrarse en 1961 a iniciativa dun grupo de intelectuais reunidos arredor do Ateneo do Ullán, entre eles o escritor e tradutor Plácido Castro e mais o sacerdote de Rianxo Faustino Rey Romero”, avanza.
O vicesecretario da RAG, o historiador Lourenzo Fernández Prieto, moderará a mesa, organizada coa colaboración do Concello de Vigo, a Fundación Penzol, a Deputación de Pontevedra, a Xunta de Galicia e o Ministerio de Ciencia, Innovación e Universidades.
