Sarria dedícalle unha rúa e un mural a Xela Arias

Xela Arias conta dende onte cunha rúa en Sarria, a localidade luguesa onde naceu e onde tiña as raíces toda a súa familia. O espazo foi inaugurado nun acto no que se presentou un mural co rostro da autora, obra do artista Mon Devane, e un monólito no que se gravou un poema de Darío a diario (1996). A escritora dedicou este libro ao seu fillo, que interveu na celebración en nome da familia. Tamén tomou a palabra o presidente da Real Academia Galega, Víctor F. Freixanes, quen destacou a "resposta social espectacular" que está a ter a decisión da institución de dedicarlle o Día das Letras Galegas 2021 á poeta, tradutora, editora e profesora.

Un momento da inauguración da rúa Xela Arias. Autor: Víctor Formeselle

O alcalde de Sarria, Claudio Garrido, salientou a honra que supón para o concello que Xela Arias sexa recoñecida "como unha das grandes autoras" galegas e o investigador Xaime Félix López Arias repasou a historia da rúa que levará o seu nome. Este espazo, con 160 anos de historia, levaba dende 1957 o nome de José Antonio. "Quitarlle o nome dun fascista e darlle o nome de Xela Arias é un dos actos polo que calquera sarriao de ben estaría disposto a meterse en política", expresou e rexedor.

Darío Gil Arias, fillo da homenaxeada, manifestou tamén a alegría que supón para a familia que unha rúa de Sarria lembre a Xela Arias e que saia do rueiro local o do fundador da Falanxe.

Darío Gil e Amparo Castaño, fillo e nai de Xela Arias; o alcalde de Sarria, Claudio Garrido; e o presidente da Real Academia Galega, Víctor F. Freixanes, destapan o monólito dedicado a Xela Arias. Autor: Víctor Formoselle