O Congreso Internacional de Toponimia do Camiño de Santiago impulsa as novas investigacións sobre os nomes de lugar en Europa

A Real Academia Galega reunirá do 21 ao 23 de setembro os principais especialistas en onomástica xeográfica de institucións académicas galegas, españolas e europeas. O Congreso Internacional de Toponimia do Camiño de Santiago. Os camiños de Santiago de Europa cara a Galicia. Lugares, nomes e patrimonio impulsará as novas investigacións sobre os nomes de lugar en Europa, a través dunha chamada á sistematización dos estudos científicos neste eido relacionados coas distintas rutas xacobeas. 

A Real Academia Galega organiza o Congreso Internacional de Toponimia no Camiño de Santiago en colaboración coa Universidade de Santiago de Compostela e a Asociación Galega de Onomástica, e mais co apoio económico da Deputación da Coruña e da Xunta de Galicia. O presidente da RAG, Víctor F. Freixanes; a académica de número e coordinada do encontro Ana Boullón; o coordinador do Seminario de Onomástica da RAG, Antón Santamarina; o reitor da USC, Antonio López; e o secretario xeral de Política Lingüística, Valentín García, presentaron hoxe en rolda de prensa o encontro, que se desenvolverá na Facultade de Filoloxía da USC e poderá seguirse en directo a través de academia.gal. A inscrición, gratuíta, permanece aberta para todo o público ata o 12 de setembro segundo as indicacións que figuran na páxina web do congreso.

O obxectivo da cita é filolóxico, pero vai máis alá. “Queremos que o europeísmo e tamén a multidisciplinariedade percorran estas xornadas: a aplicación das novas tecnoloxías, a historia, a cartografía, o turismo ou a rehabilitación do patrimonio serán outros dos distintos eixes deste congreso”, explican as organizadoras, a académica Ana Boullón e a académica correspondente Luz Méndez. O programa afonda nunha liña aberta na VI Xornada de Onomástica Galega, que a RAG dedicou o pasado mes de outubro á onomástica no Camiño.

O congreso contará, entre outros especialistas, cos investigadores principais dos equipos de Toponomasticon Hispaniae, o proxecto coordinado pola académica Ana Boullón que ten como obxectivo o estudo e a divulgación dun corpus seleccionado de nomes de lugar de todo o territorio español e portugués e, ao mesmo tempo, o establecemento de bases metodolóxicas firmes para o estudo da toponimia.

O Camiño en Galicia, na Península e en Europa
A primeira xornada do encontro centrarase no Camiño de Santiago en Galicia e arrincará coa conferencia do académico de número electo Gonzalo Navaza, profesor da Universidade de Vigo e membro do Seminario de Onomástica da RAG. Nesta sección inaugural participarán, entre outros expertos, Xosé Manuel Sánchez Rei, da Universidade da Coruña, cunha contribución sobre a toponimia menor de Sobrado na época medieval; e Paula Bouzas, profesora do departamento de Lingüística Románica da Universidade de Gotinga (Alemaña), que presentará o Tombo de Iria como fonte de información toponímica.

O Camiño de Santiago na Península Ibérica será o eixe das intervencións da segunda xornada, con achegas arredor da onomástica no Camiño na área catalá-valenciana, e en Aragón, Portugal ou Euskadi a cargo de especialistas como o catedrático da Universitat de València Emili Casanova; Javier Giralt, presidente da Academia Aragonesa de la Lengua e director do Institut Aragonès del Català; Carlos Rocha, investigador do Centro de Linguística da Universidade de Lisboa; Patxi Salaberri, académico de número de Euskaltzaindia e catedrático da UPNA; e Mikel Gorrotxategi, de Euskaltzaindia.

O programa do venres estará dedicado ao Camiño de Santiago en Europa, á cartografía e mais á historia medieval e contará con voces como as de Elena Papa e Alda Rossebastiano, da Università di Torino, e Pierre-Henry Billy, do Centre National de la Recherche Scientifique francés, con achegas sobre a toponimia xacobea na área subalpina e Francia; Marta Montilla, do Instituto Geográfico Nacional, que falará sobre os recursos xeográficos e dixitais do Camiño da institución á que pertence; Carlos Baliñas, cunha contribución sobre os usos sociais dos sobrenomes na Galicia altomedieval e a posible influencia no Camiño; José Carlos Sánchez Pardo, que falará sobre a relación entre os topónimos e o estudo histórico da paisaxe ao redor das rúas xacobeas en Galicia; e Irene García Losquiño, que ofrecerá unha ollada á pegada da migración viquinga na paisaxe arqueolóxica e na toponimia.