A académica Marilar Aleixadre é a gañadora da última edición do Premio Luís Porteiro Garea da Universidade de Santiago en recoñecemento ao seu labor a prol do galego no ámbito universitario. Catedrática xubilada da Área de Didáctica das Ciencias Experimentais da mesma institución, a bióloga e escritora, natural de Madrid, fixo do galego a súa lingua de expresión profesional, literaria e vital dende a súa chegada a Galicia nos anos 70 do século pasado.
A actual arquiveira-bibliotecaria da RAG súmase con este recoñecemento ás persoas gañadoras en anteriores edicións: Manuel Bermejo Patiño, Xosé Antón Gómez Segade, Antón Costa Rico, Antonio Rigueiro Rodríguez, Xosé Manuel Beiras e a secretaria da RAG, a catedrática de Comunicación Audiovisual Margarita Ledo Andión.
