![](/documents/35271/78504/18.10.16_01_01.jpg)
Foto de familia dos participantes na entrega dos premios Contádenos o voso Día das Letras. Fonte: RAG
A Real Academia Galega puxo en marcha o concurso Contádenos o voso Día das Letras dentro do proxecto web Primavera das Letras, que ofrece desde 2016, co apoio da Deputación da Coruña, materiais lúdicos e didácticos arredor da figura homenaxeada co gallo do Día das Letras Galegas pensados para as etapas de infantil e primaria. Ao certame, concibido para coñecer e divulgar como celebran os centros educativos esta festa da lingua e da cultura galegas, concorreron este ano un total de 82 centros educativos de toda Galicia, con propostas que abranguen desde as artes escénicas á música para recrear o universo vital e literario de María Victoria Moreno.
Todos estes ingredientes estiveron presentes no acto de entrega dos premios, presentado polo presidente da RAG, Víctor F. Freixanes, e conducido por Fina Casalderrey. Tamén interviñeron Pedro Ferriol, o viúvo de María Victoria Moreno; Francisco Castro, director xeral de Galaxia; Andrea Jamardo, de Urco Editora; e Teresa Rocamonde, responsable de comunicación de Bolanda. Estas tres editoriais e mais Xerais colaboraron no concurso achegando os lotes de libros que recibiron os tres centros gañadores.
"A primavera das letras sodes vós", díxolles aos alumnos e alumnas Fina Casalderrey, quen lles deu a benvida á "casa das letras, a casa das palabras". "Aquí estúdanse as palabras, e tamén se curan aquelas que o precisan para despois deixalas voar libres, e para dalas a coñecer", explicoulles. A celebración foi, ademais dunha homenaxe a María Victoria Moreno, un recoñecemento público da profesión docente, que exerceu a escritora. "Moitas grazas a todo o profesorado, porque vós sodes o corazón da causa da lingua e desta Primavera das Letras que celebramos", expresou Víctor F. Freixanes. En nome da familia da autora, Pedro Ferriol tamén se referiu ao labor docente. "Os actos institucionais dedicados a María Victoria Moreno enchéronnos de emoción, pero moito máis aínda o fixeron os centos de colexios que estiveron recordando a María Victoria Moreno ao longo deste ano con distintas mostras de cariño e amor cara a ela", agradeceu.
Os primeiros en subir ao escenario en que se converteu o estrado do salón de actos da Real Academia Galega foron os máis pequenos, os 44 alumnos e alumnas de 4 e 5 anos da Escola de Educación Infantil do Milladoiro, que recitaron en grupo un fragmento do conto en verso "Can branco, can negro". O relato está incluído no libro Eu conto, ti cantas… de María Victoria Moreno, onde os protagonistas son sempre os animais. Os favoritos da autora, os cans, centraron o proxecto que esta escola desenvolveu co gallo do Día das Letras Galegas, plasmado nunha exposición dedicada a ela chea de canciños de peluche. A directora, Ángeles Ferrón Novais, agradeceu a colaboración das familias e insistiu na importancia dos mestres e mestras na transmisión da lingua e a cultura. "María Victoria Moreno era unha mestra que dicía que florecía nas aulas, e non hai mellor agasallo para nós que nacer todos os días un pouco nelas", expresou a docente, quen quixo salientar o que significou para ela ter como profesora a escritora Helena Villar Janeiro, membro correspondente da RAG. "Non foi só a miña profesora de lingua e literatura galegas, ensinoume tamén a amar a literatura e as nosas letras e a ser quen de transmitir a nosa cultura", asegurou.
![](/documents/35271/78504/18.10.16_01_02.jpg)
O alumnado da EEI do Milladoiro recita un poema de María Victoria Moreno. No centro, canciños de peluche que se empregaron na exposición dedicada á autora e o seu amor polos animais nesta escola de Ames. Fonte: RAG
O CPI Virxe da Cela achegou o alumnado á autora a través da radio. O de primeiro e segundo gravou un conto inspirado en personaxes das obras de María Victoria Moreno e o de cuarto, un programa dedicado á autora con entrevistas a Eli Ríos, Monste Pena, Francisco Castro, Fran Alonso e Andrea Jamardo. A radio tamén estivo presente na súa intervención na Academia, onde Elías Espiñeira e Iria Lence, de 3º e 5º de primaria, tomaron a palabra e déronllela tamén a outros compañeiros e compañeiras a través de varios cortes de audio. Laboratorio de Radio.
![](/documents/35271/78504/18.10.16_01_03.jpg)
Elías Espiñeira e Iria Lence interveñen en representación do CPI Virxe da Cela de Monfero. Fonte: RAG
En representación do CEIP Anxo da Garda, tras un resumo do traballo desenvolvido polo equipo de dinamización lingüística do centro ofrecido polo mestre Fernando Pazos, a alumna de 6º de primaria Sabela Pérez Regueira, caracterizada como María Victoria Moreno, foi a encargada de agradecer o galardón en nome de toda a comunidade educativa e presentar a adaptación musical do poema "Cantiga" (incluído en Elexías de luz) que deseguido interpretaron nove alumnos e alumnas de 4º, 5º e 6º. O colexio coruñés participou no concurso cun conxunto de actividades variadas entre as que tamén figuran a dramatización dunha entrevista á autora, o concurso "Quen sabe máis de Mª Victoria Moreno?", lecturas de fragmentos de obras da escritora no centro de día de Eirís ou un xogo de cuarto de escape.
![](/documents/35271/78504/18.10.16_01_04.jpg)
Alumnado do CEIP Anxo da Garda interpreta "Cantiga". O colexio coruñés púxolle música e coreografía a este poema de María Victoria Moreno, entre outras moitas iniciativas arredor das Letras Galegas 2018. Fonte: RAG
Pola súa banda, os representantes das editoriais colaboradoras nos premios salientaron a conexión de María Victoria Moreno co público máis novo e a perspectiva feminista de obras como Anagnórise. Bolanda dedicoulle este ano á escritora un dos números da colección dos Bolechas centrada nos persoeiros homenaxeados co Día das Letras Galegas; Urco Editora puxo o foco sobre ela xa en 2016, cando decidiu incluíla na colección Mulleres Bravas da nosa Historia, e editou relatos e ensaios da súa autoría que permanecían inéditos, ademais de reeditar outros. Parte da súa obra tamén pode lerse nos catálogos de Xerais e Galaxia, editorial esta última na que foi codirectora da colección Árbore.