'Ise neno da rúa', poesía social e vixente medio século despois

"A vea social que anos máis tarde estoupou e se popularizou con Celso Emilio Ferreiro está neste libro representada por tremendos poemas como o derradeiro que describe unha aldea abandonada, ou coma aqueloutro estremecedor que se titula Ise neno da rúa", salienta o académico Darío Xohán Cabana de Canle segredo. Nas vésperas da homenaxe da Academia ao seu autor, Xosé María Álvarez Blázquez, co gallo do centenario do seu nacemento, relemos ese aqueloutro poema, escrito en 1953 pero cheo de forza e vixencia medio século despois.

Na xornada dedicada a Álvarez Blázquez, que se celebrará no seu Tui natal o vindeiro 15 de setembro, Darío Xohán Cabana recordará o tempo compartido co homenaxeado nos anos 70 como colaborador de Edicións Castrelos. Na colección Pico Sagro desta editorial, creada polo propio Álvarez Blázquez, sairía á luz Canle segredo en 1976, dúas décadas despois de merecer o Premio Eduardo Pondal do Centro Galego de Buenos Aires.

ISE NENO DA RÚA
NON É CERTO que os nenos teñan fame.
Non pode ser.
Ben o sabedes todos
os que andades no mundo atafegados
á percura do pan dos vosos fillos.
Ises outros que vedes pola rúa
pedindo esmola,
non teñen fame, non, porque daquela
vos teríades morto de vergonza.
E ben vos vexo andar nos vosos coches
ou nos tranvías, a berrar de cousas
estranas, -viva, beba,baba, buba!-
sin reparar naquil esfarrapado
que coa moura mauciña está petando
nunha porta de ferro.
Por iso penso que non é verdade
o que algún caviloso di dos nenos
que andan así, petando pola vida.
-Non, home, non! –lle dixen a un de aqueles-.
A xente pasa leda… Fora boa
que andivesen a rirse dos seus crimes!

O escritor Xosé María Álvarez Cáccamo, fillo de Álvarez Blázquez, participará tamén na xornada de homenaxe cunha intervención centrada en Canle Segredo e a investigadora da Universidade de Vigo Ana Acuña Trabazo achegará Novas vías para o (re)coñecemento da vida e obra de Xosé María Álvarez Blázquez. A académica Margarita Ledo moderará a mesa.