O escritor e membro de número da Real Academia Galega, Manuel Rivas Barrós, participou o pasado domingo 13 de maio nun acto en defensa da Serra do Galiñeiro.

Manuel Rivas dando lectura ao seu manifesto pola defensa da Serra do Galiñeiro diante dunhas 2000 persoas

No seu discurso, o académico destacou a importancia da conservación do noso patrimonio natural e paisaxístico nun manifesto que aludiu á diversidade e á riqueza da xeografía galega. En palabras do autor:

"A Terra vira, o astro orbita na súa andanza de vida e morte e vida arredor do sol, mais cando algo importante sucede, algo que lle é grato, vai e pousa e acouga. Nun lugar onde se concentra a máis poderosa enerxía da Terra: a da solidariedade, o don de entrelazar soidades para rescatar a esperanza, un lugar ritual, hai que dicilo así, porque aquí maniféstase un compromiso cívico, un xuramento, de solidariedade humana e desta humanidade coa natureza, co seu fogar, co seu ventre matricial."

O evento, que tivo lugar no propio monte do Galiñeiro situado na parroquia de Vincios, no concello de Gondomar, contou tamén coa presenza dos poetas Xosé María Álvarez Cáccamo e Anxo Angueira entre outros, así como coas actuacións musicais de Tino Baz e O Leo.