Representantes das distintas institucións que conmemorarán o Ano Castelao nun momento do acto.
Fonte: RAG
Dúas integrantes da Asociación do Traxe Galego levan un centro de flores ao sartego de Castelao.
Fonte: RAG
Miguel Anxo Seixas, presidente da Fundación Castelao, na apertura do acto.
Fonte: RAG
O vicesecretario e o presidente da RAG, Henrique Monteagudo e Víctor F. Freixanes, ante o sartego de Castelao.
Fonte: RAG
A tradicional ofrenda floral que a Fundación Castelao celebra cada 7 de xaneiro no Panteón de Galegas e Galegos Ilustres –onde descansan os restos mortais do intelectual dende 1984– marcou desta volta o inicio do calendario de actividades que se organizarán ao longo do ano para divulgar a figura, a obra e o pensamento de Afonso Daniel Rodríguez Castelao, “un home que nos fixo, que nos fai e que nos fará sempre mellores”, enfatizou Miguel Anxo Seixas.
A poeta e patroa da Fundación Castelao Noelia Gómez conduciu a homenaxe, que contou na parte musical coa soprano Beatriz Riobó Agulla, a frauta de Fernando Raña Barreiro e a arpa de Alba Barreiro Mariño. Os tres intérpretes fixeron soar “Lela”, composición de Castelao para Os vellos non deben de namorarse, varias pezas populares e mais o Himno. Tras a ofrenda floral, servíuselles aos asistentes a sopa “Cousas da vida”, unha creación da cociñeira Lucía Freitas dedicada ao artista, escritor e político que se presentou nas cuncas deseñadas para a ocasión pola artesá Susana Anta.
A Real Academia Galega puxo en marcha hoxe mesmo un novo sitio web que permitirá afondar na figura e na obra de Castelao a través dos fondos que custodia. Entre eles figura a bandeira do Consello de Galiza, que abre a sección “Pezas descatadas”. A chamada bandeira de Castelao, doada pola súa viúva, empregouse na multitudinaria despedida do escritor no exilio de Buenos Aires. Castelao recibiu sepultura no cemiterio da Chacarita, onde o seu corpo permaneceu ata que, unha ves restaurada a democracia en España, foi traslasdado a San Domingos de Bonaval.
