Luz Pozo Garza.
Neste libro -alén das homenaxes a Rimbaud, Rosalía, Luís Seoane, Luís Pimentel, Ánxel Fole e Xosé María Álvarez Blázquez entre outros, e das múltiples referencias musicais e pictóricas- pódense detectar algúns dos trazos de estilo que a crítica ten salientado nesta autora: o tratamento en clave simbólica do material íntimo, o testemuño histórico e a elegancia formal.
FAR BLUES
Naquela cidade
onde unha rapaza escribía un diario secreto
na noite
mentres o soño desvalido semellaba finxir
silencios compartidos
nesa vella cidade do norte
o primeiro poema de amor flutuaba
coma un blues nostálxico na noite.
Só quería saber
por qué as cordas permanecen vibrando coma labios
e qué queda do diario secreto
na noite desvalida.
Querería saber daquel río esvaído do soño
tal unha despedida sen retorno,
do silencio curvado nunha praza deserta e antiga.
¿Onde vai o primeiro poema de amor
a materia sonora dun blues fuxidío
a inocencia primeira?
