Henrique Monteagudo, Ernesto González, Alonso Montero, Valentín García e Manuel González
No peche dos cursos estiveron presentes o presidente da Real Academia Galega, Xesús Alonso Montero; o secretario xeral de Política Lingüística, Valentín García Gómez, o director do Instituto da Lingua Galega, Ernesto González Seoane; o director do curso, Manuel González, o secretario da Academia, Henrique Monteagudo; a tesoureira, Rosario Álvarez; os membros numerarios Ramón Lorenzo, Antón Santamarina e Xosé Luís Regueira, Francisco Fernández Rei e o profesor da Universidade de Casteddu (Cagliari), Diegu Corraine.
"Hoxe temos que expresar, en primeiro lugar, a nosa satisfacción ao vermos incrementada a familia dos falantes de galego con persoas que escolleron libremente coñecer a nosa lingua". Deste xeito empezou o seu discurso o membro numerario da Academia e director dos XXVI cursos de verán de galego para estranxeiros, Manuel González quen, despois de agradecer a súa axuda aos colaboradores que participaron de balde no curso, rematou a súa intervención reclamando a súa continuidade nos vindeiros anos.
"De aquí en adiante, esta é a vosa casa" declarou o director do Instituto da Lingua Galega, Ernesto González Seoane, dirixíndose aos alumnos da XXVI edición dos cursos de verán. "Hoxe queremos transmitir tamén unha mensaxe optimista e de confianza no futuro", declarou González Seoane logo de manifestar o firme compromiso do ILGa na continuidade dos cursos.
O secretario xeral de Política Lingüística, Valentín García Gómez, empezou a súa alocución manifestando a súa confianza na continuidade dos cursos de verán, e, en referencia aos alumnos comentou: "Vós sodes unha parte moi importante na proxección exterior da nosa lingua, os embaixadores do galego no mundo. Querémosvos comunicar hoxe a nosa esperanza na vosa colaboración na construción desa grande obra colectiva que é unha lingua".
Na súa intervención, o presidente da Real Academia Galega, Xesús Alonso Montero, declarou o seu interese en coñecer a impresión que os alumnos do curso tiraran sobre a nosa situación sociolingüística: "Esta é a primeira vez que moitos de vostedes tiveron relación íntima coa lingua galega, e a nós gustaríanos saber cal é a impresión que vostedes levan sobre a relación entre o que nós explicamos nas aulas e o que efectivamente acontece na rúa, a súa impresión sobre a problemática da lingua galega, en definitiva. Para nós, esta sería unha información moi valiosa, e por iso lles pedimos que nos envíen, cada un de vostedes, un pequeno informe coas súas observacións que logo nós nos encargaremos de publicar".
