Basilio Losada recibe a Medalla de Ouro de Galicia

O académico de honra Basilio Losada recibirá hoxe, 24 de xullo, a Medalla de Ouro de Galicia en recoñecemento a toda unha traxectoria de traballo a prol da lingua e da cultura galegas. O tradutor e investigador foi o primeiro catedrático de Filoloxía Galega na Universitat de Barcelona e segue a ser un auténtico embaixador das nosas letras, especialmente en Cataluña.

Basilio Losada xunto ao monumento de homenaxe a Curros Enríquez na Coruña. Autor: RAG


Basilio Losada
(Láncara, 1930) é desde os anos 60 unha referencia obrigada da cultura galega en Cataluña, onde chegou como emigrante sendo un cativo. A través das súas traducións ao castelán, autores galegos como Celso Emilio Ferreiro, Álvaro Cunqueiro ou Xohana Torres, entre moitos outros, chegaron a espazos hispánicos alleos ata o momento á nosa literatura. Losada tamén verteu á nosa lingua autores cataláns e clásicos e contemporáneos do mundo lusófono ao castelán, chegando a gañar o Premio Nacional de Tradución por Memorial do convento, de José Saramago.

O 3 de outubro de 2015, Losada ingresou na RAG como membro de honra cun discurso sobre as primeiras novelas de Rosalía de Castro que pode descargarse nesta ligazón. A Medalla de Ouro de Galicia que recollerá hoxe en Santiago de Compostela súmase a unha ampla listaxe de galardóns concedidos por distintas institucións tanto do ámbito galego e catalán como do lusófono.

Xunto ao académico de honra, a Xunta de Galicia premia tamén nesta edición das Medallas de Galicia o arquitecto Manuel Gallego Jorreto, o artista Francisco Leiro e a banda Los Suaves.