Ana Boullón achega a historia dos nosos nomes e apelidos a estudantes de galego de todo o mundo

Ana Boullón Agrelo, coordinadora da Guía de nomes galegos e do Dicionario de apelidos galego de próxima aparición, mergullou o alumnado dos XXXV Cursos de lingua e cultura galegas  Galego sen Fronteiras na antroponimia persoal galega. A académica de número impartiu onte a derradeira conferencia desta convocatoria, unha exposición na que realizou un percorrido pola xestación dos nosos nomes e apelidos, que teñen as súas raíces na Idade Media. 

Conferencia de Ana Boullón sobre a antroponimia galega

Fonte: RAG

Conferencia de Ana Boullón sobre a antroponimia galega

Fonte: RAG

Conferencia de Ana Boullón sobre a antroponimia galega

Fonte: RAG

Conferencia de Ana Boullón sobre a antroponimia galega

Fonte: RAG

1/4

A especialista en onomástica explicou como se formaron, de que están compostos, cales son os nomes e apelidos máis frecuentes e como mudaron os nomes ao longo dos séculos, entre outras cuestións. A catedrática de Filoloxía Galega da USC referiuse ademais á situación sociolingüística que implicou a castelanización dos antropónimos, parcial no caso dos apelidos e case total para os nomes, e ás ferramentas das que hoxe dispoñemos para restaurar as formas de noso.

Os Cursos de lingua e cultura galegas “Galego sen fronteiras” son unha iniciativa da Real Academia Galega e o Instituto da Lingua Galega da Universidade de Santiago de Compostela que se desenvolve co apoio da Deputación da Coruña e a Xunta de Galicia. A trixésimo quinta edición conclúe mañá na Facultade de Filosofía coa entrega dos diplomas aos sesenta estudantes que participaron nesta edición, alumnos e alumnas procedentes dunha vintena de países de Europa, América e Asia.