Varias persoas pasean nos xardíns de San Carlos entre os carteis

Os cincuenta carteis realizados por cincuenta deseñadores e cincuenta escritores para conmemorar os homenaxeados nos cincuenta anos do Día das Letras Galegas presentáronse onte, nunha exposición, a ceo aberto, nos Xardíns de San Carlos, da Coruña.

Os carteis, fincados na terra mediante mastros de madeira que os erguían outorgándolles protagonismo, podían ser vistos nun e noutro sentido do percorrido, pois estaban expostos polas dúas caras. Máis de cen persoas, entre deseñadores, escritores, personalidades da cultura e público xeral, asistiron á celebración que escolleu como palco o corredor circular que asoma á ría da Coruña.

Xosé Luís Méndez Ferrín, presidente da Academia; Euloxio Rodríguez Ruibal, arquiveiro-bibliotecario; Francisco Fernández Rei, vicesecretario; e Manuel González González, tesoureiro, representaron á institución. Manuel Gónzalez González abriu e presentou o acto, salientando a iniciativa como "unha das poucas ocasións onde se puideron dar cita un gran número de axentes e entidades culturais, sendo quen de involucrar a 100 creadores que actuaron con total liberdade e xenerosidade". A seguir, deu a palabra aos representantes das asociacións participantes, comezando por Belén López, representante da Asociación de Editores, que leu o manifesto conxunto en nome de todas as entidades participantes. Posteriormente, Marcos Dopico, presidente da Asociación de Deseñadores, agradeceu o convite da Academia e a colaboración do resto das entidades que conformaron o proxecto. Pola súa banda, Cesáreo Sánchez, presidente da Asociación de Escritores en Lingua Galega, agradeceu o convite e definiu ás cincuenta figuras homenaxeadas como "fundadores da nación", ao tempo que reivindicou o pouco valorado labor dos escritores e dos traballadores da cultura. Por último, Jacobo Bermejo, presidente da Asociación de Artes Gráficas, felicitou á Real Academia Galega polo cincuenta aniversario do Día das Letras e pola iniciativa que se estaba a presentar. Asemade, salientou o papel dos impresores como transmisores da cultura, lembrando a figura do comprometido editor, Ánxel Casal.

Por parte dos deseñadores participantes interviñeron Xosé Salgado, que recuperou a idea de Cunqueiro ao reclamar "1.000 carteis máis para a lingua galega"; Cibrán Rico e Xesús Vázquez, que afondaron na idea de traballo e creación conxunta que supuxo a iniciativa; e Estevo Carballido, que salientou a actualidade da palabra dos homenaxeados. Na quenda dos escritores, Xavier Seoane, Chisco Fernández Naval, Mercedes Queixas, Manuel Lourenzo e Cesáreo Sánchez, nesta orde, leron cadanseu texto creado para unha figura das Letras Galegas.

Diversos momentos do discorrer do acto

O presidente da Academia pechou o acto destacando o papel motor da Academia nesta iniciativa, así como a importancia do traballo mancomunado, no que tamén incluíu o esforzo invisible dos distribuidores, dos profesores e dos alumnos que empregaron os carteis para reivindicar e aprender da cultura galega. Por último, antes de pechar o acto, Méndez Ferrín lembrou a Rosalía, que nos mesmos xardíns conta cunha placa cun poema seu dedicado a Sir John Moore, e a conexión entre Galicia, Escocia, Gales e Cornualles que subxace en boa parte da nosa literatura.